കണ്ണൂര്‍: മുഖ്യശത്രു ബി.ജെ.പിയല്ല, സി.പി.എമ്മാണെന്ന കെ. സുധാകരന്റെ പ്രസ്താവന ആര്‍.എസ്.എസ് വോട്ട് ലഭിക്കാനുള്ള തന്ത്രമാണെന്നും ജനാധിപത്യവിശ്വാസികള്‍ ഈ ഹീന നീക്കം തിരിച്ചറിയണമെന്നും സി.പി.എം ജില്ലാ സെക്രട്ടറി എം.വി ജയരാജന്‍. ബി.ജെ.പിയെ ദേശീയ അടിസ്ഥാനത്തില്‍ നേരിടുന്നത് കോണ്‍ഗ്രസാണ് എന്നാണ് ആ പാര്‍ട്ടിയുടെ നേതാക്കള്‍ അവകാശപ്പെടുന്നത്. ഇക്കാര്യം കെ. സുധാകരന് അറിയാത്തതല്ല. മറിച്ച് സി.പി.എം വിരോധം പറഞ്ഞാലേ ആര്‍.എസ്.എസ് ഉള്‍പ്പെടെയുള്ള വര്‍ഗീയ ശക്തികളുടെ വോട്ടുകിട്ടൂ എന്നതുകൊണ്ടാണ് ഇത്തരത്തിലുള്ള പ്രസ്താവന നടത്തുന്നത്. രാജ്യത്തെ മഹാവിപത്തിലേക്ക് നയിക്കുന്ന വര്‍ഗീയതയ്‌ക്കെതിരേ ഒരക്ഷരം പറയാന്‍ കെ. സുധാകരന്‍ തയാറായിട്ടില്ലെന്നും എം.വി ജയരാജന്‍ പ്രസ്താവനയില്‍ ആരോപിച്ചു.