ഉപ്പള: കാസര്‍കോട് ഉപ്പള നയാബസാറില്‍ ജീപ്പും ലോറിയും കൂട്ടിയിടിച്ച് അഞ്ചു പേര്‍ തല്‍ക്ഷണം മരിച്ചു. ഏഴു പേര്‍ക്ക് പരുക്കേറ്റു. മംഗളൂരു കെ.സി.റോഡ് അജജിലടുക്ക സ്വദേശികളായ ബീഫാത്തിമ (65), അസ്മ(30), നസീമ (38), മുസ്താഖ് (41), ഇംത്യാസ് (35) എന്നിവരാണ് മരിച്ചത്. കാസര്‍കോട് മംഗളൂരു ദേശീയ പാതയില്‍ ഉപ്പളയ്ക്കു സമീപം താലൂക്ക് ആശുപത്രിക്കു തൊട്ടു മുന്നിലാണ് നാടിനെ നടുക്കിയ അപകടം നടന്നത്. ഇന്നുരാവിലെ 6.15 ഓടെയായിരുന്നു അപകടം. മരിച്ചവര്‍ ഒരേ കുടുംബത്തില്‍ പെട്ടവരാണ്.

കര്‍ണ്ണാടക രജിസ്‌ട്രേഷന്‍ ജീപ്പ് കാസര്‍കോട് അടക്കം സിയാറത്ത് നടത്തി തിരിച്ചു പോവുകയായിരുന്നു.

പെട്രോളിങ്ങിലായിരുന്ന ഹൈവേ പൊലിസും തൊട്ടടുത്ത് തന്നെ ഫയര്‍‌സ്റ്റേഷനും ഉള്ളതു കാരണം ഉടന്‍ തന്നെ ജീപ്പ് പൊളിച്ച് വാഹനത്തില്‍ കുടുങ്ങിയവരെ പുറത്ത് എടുത്തു.

പരുക്കേറ്റവരെ മംഗളൂരുവിലെ ആശുപത്രിയിലേക്കു കൊണ്ടുപോയി. മൃതദേഹങ്ങള്‍ ഹോം താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. പൊലിസും നാട്ടുകാരും രക്ഷാ പ്രവര്‍ത്തനത്തിനു നേതൃത്വം നല്‍കി.