പെരിങ്ങത്തൂര്‍: ലോക രാഷ്ട്രങ്ങള്‍ക്കു മുന്‍പില്‍ അഭിമാനത്തോടും സമാധാനത്തിലും ജീവിക്കുന്ന കേരളീയര്‍ക്കിടയില്‍ തീവ്രവാദ പ്രസ്ഥാനങ്ങള്‍ ചലനങ്ങള്‍ സൃഷ്ടിക്കുന്നത് മതേതര വിശ്വാസികള്‍ ജാഗ്രതയോടെ കാണണമെന്ന് പാണക്കാട് സയ്യിദ് മുനവ്വിറലി ശിഹാബ് തങ്ങള്‍. ഖത്തര്‍ കെ.എം.സി.സി പെരിങ്ങളം പഞ്ചായത്ത് കമ്മിറ്റിയുടെ ആഭിമുഖ്യത്തില്‍ പുല്ലൂക്കരയിലും അണിയാരം ശിഹാബ് തങ്ങള്‍ റിലീഫ് സെല്ലിന്റെ സഹായത്തോടെ അണിയാരത്തും നിര്‍മിച്ചു നല്‍കിയ കാരുണ്യ ഭവനങ്ങളുടെ താക്കോല്‍ദാനം നിര്‍വഹിച്ചു സംസാരിക്കുകയായിരുന്നു അദ്ദേഹം.
കാരുണ്യസേവന രംഗത്ത് കെ.എം.സി.സി നടത്തുന്ന പ്രവര്‍ത്തനങ്ങള്‍ ലോകത്തിന് മാതൃകകയാണെന്നും രാഷ്ട്രീയ പ്രവര്‍ത്തനങ്ങള്‍ നന്മയുടെ വഴിലേക്ക് എങ്ങനെ തിരിച്ചുവിടാമെന്ന് പ്രവൃത്തി പഥത്തില്‍ കൊണ്ടുവരികയാണ് മുസ്‌ലിം ലീഗും കെ.എം.സി.സിയും ചെയ്യുന്നതെന്നും തങ്ങള്‍ കൂട്ടിച്ചേര്‍ത്തു.
കെ.കെ മുഹമ്മദ് ഉദ്ഘാടനം ചെയ്തു. ഖത്തര്‍ കെ.എം.സി.സി പഞ്ചായത്ത് പ്രസിഡന്റ് ഇ.എ മജീദ് അധ്യക്ഷനായി. അബ്ദുനാസര്‍ മുഖ്യപ്രഭാഷണം നടത്തി. എന്‍.എ അബൂബക്കര്‍, പാനൂര്‍ നഗരസഭാ അധ്യക്ഷ കെ.വി റംല, എ.സി ഇസ്മാഈല്‍, സി.കെ.വി യൂസഫ്, ഇ.എ നാസര്‍, ടി.കെ ഹനീഫ്, കൂടത്തില്‍ കുഞ്ഞബ്ദുള്ള, കുറുവാളി മമ്മു ഹാജി, ഹാരിസ് കൊല്ലത്തി, നൗഷാദ് അണിയാരം, ആവോലം ബഷീര്‍, സി.കെ നജാഫ്, ഉമൈസ തിരുവമ്പാടി, കെ.കെ കദീശ, അഷ്‌റഫ് പുല്ലൂക്കര, സി.എച്ച് സൂപ്പി സംസാരിച്ചു.