വടകര: വീട്ടമ്മയുടെ കഴുത്തില്‍നിന്ന് അജ്ഞാതസംഘം രണ്ടു പവന്റെ സ്വര്‍ണമാല കവര്‍ന്നു. മടപ്പള്ളി കോളജിനടുത്ത് അറക്കല്‍ റോഡിലൂടെ പോകുകയായിരുന്ന വയലില്‍ ഗോപാലന്റെ ഭാര്യ വസന്തയുടെ കഴുത്തില്‍നിന്നാണു സംഘം ആഭരണം കവര്‍ന്നത്.
ഇന്നലെ ഉച്ചയ്ക്ക് ഒന്നേകാലോടെയാണു സംഭവം. ബൈക്കിലെത്തിയ രണ്ടുപേരാണു സ്വര്‍ണം തട്ടിയെടുത്തത്. വെള്ളിക്കുളങ്ങര പാല്‍ സൊസൈറ്റിയിലെ ജീവനക്കാരിയായ വസന്ത ജോലി കഴിഞ്ഞു വീട്ടിലേക്കു മടങ്ങുകയായിരുന്നു. വസന്തയുടെ പരാതി പ്രകാരം ചോമ്പാല പൊലിസ് കേസെടുത്ത് അന്വേഷണമാരംഭിച്ചു. പ്രദേശത്തെ സി.സി.ടി.വി കാമറ ദൃശ്യങ്ങള്‍ പൊലിസ് പരിശോധിച്ചുവരികയാണ്.
കഴിഞ്ഞ ദിവസം സമാനരീതിയിലുള്ള സംഭവം കാര്‍ത്തികപള്ളിയിലും റിപ്പോര്‍ട്ട് ചെയ്തിട്ടുണ്ട്. പ്രദേശത്തെ അധ്യാപികയുടെ നാലുപവന്‍ സ്വര്‍ണാഭരണമാണു മോഷ്ടാക്കള്‍ കവര്‍ന്നത്.