ആലപ്പുഴ: ഒളിവില്‍ കഴിഞ്ഞിരുന്ന കൊലപാതക ശ്രമം കേസിലെ പ്രതിയെ രണ്ടു വര്‍ഷത്തിന് ശേഷം ആലപ്പുഴ നോര്‍ത്ത് പൊലിസ് പിടികൂടി.
ആലപ്പുഴ ആര്യാട് മൂന്നാം വാര്‍ഡില്‍ പൊക്കാനായില്‍ ബിജുവിനെ കുത്തിയ കേസിലെ പ്രതി കൊല്ലം കേരളപുരം മാമ്പുഴ ഞെട്ടയില്‍ നവാസ് (45) നെയാണ് പൊലിസ് പിടികൂടിയത്. 2016 ല്‍ ആയിരുന്നു കേസിനു ആധാരമായ സംഭവം. ആലപ്പുഴ ടൗണില്‍ ഉണ്ടായിരുന്ന തട്ടുകടയിലെ ജോലി സംബന്ധമായ തര്‍ക്കമാണ് കത്തിക്കുത്തില്‍ കലാശിച്ചത്. നവാസ് നടത്തിയിരുന്ന തട്ടുകടയില്‍ തൊഴിലാളി ആയിരുന്നു കുത്തേറ്റ ബിജു.
മറ്റൊരു കട തുടങ്ങാന്‍ ഉള്ള ശ്രമത്തില്‍ പഴയ തട്ടുകട നോക്കി നടത്താന്‍ ബിജുവിനെ ഏല്‍പ്പിച്ചു. തുടര്‍ന്നു കട നഷ്ടത്തിലായി. ഇത് ചോദ്യം ചെയ്തതില്‍ വാക്ക് തര്‍ക്കം ഉണ്ടാകുകയും കൈയ്യില്‍ കരുതിയിരുന്ന കത്തി എടുത്തു ആദ്യം പിടലിക്കും പിന്നെ തലക്കും കുത്തുകയായിരുന്നു. നിലത്തു വീണ ബിജുവിനെ വീണ്ടും വയറിലും മുതുകിലും കുത്തിയ ശേഷം പ്രതി രക്ഷപ്പെട്ടു. തുടര്‍ന്നു വണ്ടാനം മെഡിക്കല്‍ കോളജിലെ പ്രവേശിപ്പിക്കപ്പെട്ട ബിജു രക്ഷപ്പെട്ടു. ഒളിവിലായിരുന്ന പ്രതിക്കായി പൊലിസ് അന്വേഷണം നടത്തിയെങ്കിലും ഇയാള്‍ തമിഴ്‌നാട്, കര്‍ണാടക എന്നിവിടങ്ങളില്‍ ഒളിവിലായിരുന്നു.
രണ്ടാഴ്ച മുന്‍പ് അന്വേഷണം ഊര്‍ജിതമാക്കിയ നോര്‍ത്ത് പൊലിസ് വളരെ തന്ത്രപൂര്‍വം പ്രതിയെ കുടുക്കുയായിരുന്നു. കോടതിയില്‍ ഹാജരാക്കിയ പ്രതിയെ 15 ദിവസത്തേക്ക് റിമാന്‍ഡ് ചെയ്തു.