ശ്രീനഗര്‍: ഇന്നലെയും പതിവുപോല തനിക്ക് കിട്ടിയ ദൗത്യവുമായി അസോസിയേറ്റഡ് പ്രസ് ഫോട്ടോ ഗ്രാഫര്‍ ദാര്‍ യാസിന്‍ ജോലിക്കായി ഇറങ്ങി. അപ്പോഴാണ് റോഡില്‍ രക്തത്തില്‍ കുളിച്ച് ഒരു പെണ്‍കുട്ടി റോഡില്‍ കിടക്കുന്നതായി കണ്ടത്. പിന്നീട് മറ്റൊന്നും ആലോചിച്ചില്ല. കുട്ടിയെയുമെടുത്ത് ദൂരെ പാര്‍ക്ക് ചെയ്ത തന്റെ വാഹനത്തിനടുത്തേക്ക് ഓടുകയായിരുന്നു. വാഹനത്തില്‍ കയറ്റി അദ്ദേഹം ആശുപത്രിയിലെത്തിച്ചു. 

സൈന്യത്തിനുനേരെ വിദ്യാര്‍ഥി പ്രക്ഷോഭത്തിന്റെ ഫോട്ടോ എടുക്കാനായിട്ടാണ് യാസിന്‍ എത്തിയിരുന്നത്. ഈ സമയത്താണ് 12ാംക്ലാസുകാരിയായ കുശ്ബൂ ജാന്‍ രക്തത്തില്‍ കുളിച്ചു കിടക്കുന്നത് കണ്ടത്. മേഖലയില്‍ നിരവധി കുട്ടികള്‍ സൈന്യത്തിനുനേരെ പ്രതിഷേധം ശക്തമാക്കിയിട്ടുണ്ട്. ഇതിനിടയിലാണ് കുട്ടിക്ക് പരുക്കേറ്റത്.
ഗുരുതര പരുക്കേറ്റ് റോഡില്‍ കിടന്ന കുട്ടിയെ പൊലിസോ മാധ്യമപ്രവര്‍ത്തകരോ കണ്ടതായി നടിച്ചില്ല. ഇവിടെയാണ് തന്റെ ജോലി മാറ്റിവച്ച് മാനുഷിക പരിഗണനക്ക് മുന്‍തൂക്കം നല്‍കി യാസിന്‍ പെണ്‍കുട്ടിയുടെ രക്ഷകനായത്.