വലിയ വിമാനങ്ങള്‍ക്ക് സുഗമമായി പാര്‍ക്കിങ് ബേയിലെത്താം 

സ്വന്തം ലേഖകന്‍

കൊണ്ടോട്ടി: കരിപ്പൂര്‍ വിമാനത്താവളത്തില്‍ റണ്‍വേയോട് ചേര്‍ന്ന് നവീകരിച്ച ടാക്‌സി-വേ പ്രവര്‍ത്തനക്ഷമമായി. 

വിമാനങ്ങള്‍ റണ്‍വേയില്‍ നിന്ന് പാര്‍ക്കിങ് ബേയിലേക്ക് പ്രവേശിക്കുന്ന  ടാക്‌സിവേ വീതികൂട്ടിയാണ് നവീകരിച്ചത്. 

 ഇതോടെ വലിയ വിമാനങ്ങള്‍ക്ക് അടക്കം സുഗമമായി റണ്‍വേയിലേക്ക് പ്രവേശിക്കുകയും തിരിക്കുകയും ചെയ്യാം.  കഴിഞ്ഞ നവംബറിലാണ് ടാക്‌സി വേ നവീകരണം തുടങ്ങിയത്. 

എയര്‍ഇന്ത്യയുടെ ജംബോ സര്‍വിസ് അടക്കം ആരംഭിച്ചതിന്റെ ഭാഗമായാണ് ടാക്‌സി വേ വീതി കൂട്ടാന്‍ തീരുമാനിച്ചത്.ഇതിനായി റണ്‍വേയില്‍ നേരത്തെ  പകല്‍ രണ്ട് മണിക്കൂര്‍  നിയന്ത്രണം ഏര്‍പ്പെടുത്തിയിരുന്നു.

  കൊവിഡിനെത്തുടര്‍ന്ന് വിമാനസര്‍വിസുകള്‍ നിര്‍ത്തിയ സമയം പ്രയോജനപ്പെടുത്തിയാണ് നവീകരണ പ്രവൃത്തി വേഗത്തില്‍ നടത്തിയത്.  4.23 കോടി രൂപ ചെലവഴിച്ചാണ് ഇത് പൂര്‍ത്തിയാക്കിയത്.  

ആദ്യ ഘട്ടത്തിലെ പ്രവൃത്തി പൂര്‍ത്തിയാക്കാന്‍ അഞ്ച് മാസം എടുത്തിരുന്നുവെങ്കിലും വിമാന സര്‍വിസുകളില്ലാത്ത സമയത്ത് ശേഷിക്കുന്ന ഭാഗം രണ്ട് മാസം കൊണ്ട് പൂര്‍ത്തിയാക്കാനായി.

 കോഡ് സി, ഡി ശ്രേണിയിലുള്ള ചെറിയ വിമാനങ്ങള്‍ക്ക് അനുസൃതമായ രീതിയിലായിരുന്നു നേരത്തെ കരിപ്പൂരിലെ ടാക്‌സിവേ. റണ്‍വേയില്‍ നിന്നും ടാക്‌സിവേയിലേക്ക് പ്രവേശിക്കുന്ന ഭാഗത്ത് വീതി കുറവായതിനാല്‍ വിമാനങ്ങള്‍ തിരിക്കാന്‍ ഏറെ പ്രയാസമായിരുന്നു. 

പ്രവൃത്തികള്‍ പൂര്‍ത്തിയാക്കിയതോടെ വലിയ വിമാനങ്ങള്‍ക്കും സാധാരണ രീതിയില്‍ പ്രവേശിക്കുന്നതിന് സാധിക്കും.ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡി.ജി.സി.എ) നിര്‍ദേശപ്രകാരമാണ് ടാക്‌സിവേ നവീകരിച്ചത്.