ബെയ്ജിങ്: അതിര്‍ത്തിയിലെ സംഘര്‍ഷത്തിനിടെ ചൈനീസ് ആപ്പുകള്‍ നിരോധിച്ച ഇന്ത്യന്‍ നടപടി അനുചിതമെന്ന് ചൈന. വിവേചനപരമായ നടപടി ഉടന്‍ പിന്‍വലിക്കണമെന്നും ചൈന ആവശ്യപ്പെട്ടു.

 ഇന്ത്യയുടെ നടപടി ലോക വ്യാപാര സംഘടനയുടെ ചട്ടങ്ങള്‍ക്ക് വിരുദ്ധമാണെന്നും ചൈനീസ് വിദേശകാര്യമന്ത്രാലയ വക്താവ് ഗവോ ഫെങ് അഭിപ്രായപ്പെട്ടു. നടപടി ഇന്ത്യ ഉടന്‍ തിരുത്തുമെന്നാണ് പ്രതീക്ഷ. 

 ഇന്ത്യന്‍ ഉല്‍പന്നങ്ങള്‍ക്കോ സേവനങ്ങള്‍ക്കോ എതിരേ ചൈന ഒരു തരത്തിലുമുള്ള നിയന്ത്രണങ്ങളോ വിവേചന നടപടികളോ കൈക്കൊണ്ടിട്ടില്ലെന്നും ഫെങ് പറഞ്ഞു. 

രാജ്യസുരക്ഷയ്ക്ക് ഭീഷണിയാവുമെന്ന് ചൂണ്ടിക്കാട്ടിയാണ് ടിക് ടോക് അടക്കമുള്ള  ചൈനീസ് ആപ്പുകള്‍ക്ക്  ഇന്ത്യയില്‍ വിലക്ക് ഏര്‍പ്പെടുത്തിയത്. 

ചൈനയ്‌ക്കെതിരേയള്ള ഡിജിറ്റല്‍ സ്‌ട്രൈക്ക് എന്നാണ് ഇതിനെ ഇന്ത്യന്‍ വിദേശകാര്യ മന്ത്രാലയം വിശേഷിപ്പിച്ചത്. 

 

 

വാഷിങ്ടണ്‍: ചൈനീസ് മൊബൈല്‍ ആപ്പുകള്‍ നിരോധിച്ച ഇന്ത്യന്‍ നടപടിയെ സ്വാഗതം ചെയ്ത് യു.എസ്. 

ആപ്പുകള്‍ നിരോധിച്ച നടപടി ഇന്ത്യയുടെ പരമാധികാരത്തിനും  ദേശീയ സുരക്ഷയ്ക്കും ഗുണകരമാവുമെന്ന് സ്റ്റേറ്റ് സെക്രട്ടറി മൈക്ക് പോംപിയോ അറിയിച്ചു. ചൈനയുടെ അതിക്രമത്തില്‍ തകര്‍ന്നുപോകില്ലെന്ന് വ്യക്തമാക്കുകയാണ് ഇന്ത്യയെന്ന് ഐക്യരാഷ്ട്ര സംഘടനയിലെ യു.എസിന്റെ മുന്‍ അംബാസഡര്‍ നിക്കി ഹാലെയും അഭിപ്രായപ്പെട്ടു.