വണ്ടൂര്‍: ഓട്ടോയില്‍ ഒളിപ്പിച്ചു കടത്തുകയായിരുന്ന നൂറു പൊതി കഞ്ചാവുമായി യുവാവ് എക്‌സൈസ് സംഘത്തിന്റെ പിടിയിലായി. മഞ്ചേരി നറുകര ഉള്ളാട്ടില്‍ അബൂബക്കറാ(32)ണു പ്രിവന്റീവ് ഓഫിസര്‍ ടി.ഷിജുമോന്റെ നേതൃത്വത്തിലുള്ള സംഘത്തിന്റെ പിടിയിലായത്.
തിരുവാലി പൂന്തോട്ടംകടവില്‍ വെച്ചാണു രഹസ്യ വിവരത്തെത്തുടര്‍ന്നുള്ള പരിശോധനയില്‍ അബൂബക്കര്‍ പിടിയിലായത്. കഞ്ചാവിനായി ഇയാളെ സമീപിച്ച വിദ്യാര്‍ഥികള്‍ എക്‌സൈസ് സംഘത്തെ കണ്ടു ബൈക്കില്‍ രക്ഷപ്പെട്ടു. മോഷണകേസിലുള്‍പ്പെടെ നിരവധി കേസുകളില്‍ പ്രതിയായ അബൂബക്കര്‍ ആറു മാസങ്ങള്‍ക്കു മുമ്പു മഞ്ചേരി എക്‌സൈസിന്റെ പിടിയിലായിരുന്നു.
മഞ്ചേരി കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. സിവില്‍ എക്‌സൈസ് ഓഫിസര്‍മാരായ വി.സുഭാഷ്, പി.അശോക്, പി.കെ പ്രശാന്ത്, ആര്‍.പി സുരേഷ് ബാബു എന്നിവരടങ്ങിയ സംഘമാണു പ്രതിയെ പിടികൂടിയത്.