സ്വന്തംലേഖകന്‍

കോഴിക്കോട്: സംസ്ഥാനത്തെ വന്‍കിട ബഹുനില കെട്ടിടങ്ങളുടെ സുരക്ഷ സംബന്ധിച്ച് ഫയര്‍ഫോഴ്‌സ് വീണ്ടും തദ്ദേശ സ്വയംഭരണ സ്ഥാപനങ്ങളുടെ സഹായം തേടുന്നു. സുരക്ഷാ മാനദണ്ഡങ്ങള്‍ പാലിക്കാത്ത കെട്ടിടങ്ങളുടെ പൂര്‍ണവിവരങ്ങള്‍ സഹിതം തദ്ദേശസ്ഥാപനങ്ങള്‍ക്ക് ഫയര്‍ഫോഴ്‌സ് റിപ്പോര്‍ട്ട് നല്‍കും. 

 വീഴ്ച വരുത്തുന്ന സ്ഥാപനങ്ങള്‍ക്കെതിരേ നടപടി സ്വീകരിക്കാന്‍ ഫയര്‍ഫോഴ്‌സിന് അധികാരമില്ല. ഈ സാഹചര്യത്തിലാണ് കെട്ടിടങ്ങളുടെ നിയന്ത്രണാധികാരമുള്ള തദ്ദേശ സ്വയംഭരണ സ്ഥാപനങ്ങളുടെ സഹായം തേടാന്‍ തീരുമാനിച്ചത്. സംസ്ഥാനത്തെ 60 ശതമാനം കെട്ടിടങ്ങളും സുരക്ഷ മാനദണ്ഡങ്ങളില്ലാതെയാണ് പ്രവര്‍ത്തിക്കുന്നതെന്ന് നേരത്തെ നടത്തിയ പരിശോധനകളില്‍ കണ്ടെത്തിയിരുന്നു. ബഹുനില കെട്ടിടങ്ങളില്‍ പലതും അഗ്‌നിരക്ഷാ സേനയുടെ എന്‍.ഒ.സി പുതുക്കാറില്ല. 15 മീറ്ററിനു മുകളില്‍ ഉയരമുള്ള കെട്ടിടങ്ങള്‍ക്കാണ് ഫയര്‍ എന്‍.ഒ.സി ആവശ്യമായുള്ളത്. ആദ്യ അനുമതി ലഭിച്ച് കഴിഞ്ഞാല്‍ കെട്ടിട നമ്പര്‍ ലഭിക്കും. കെട്ടിട നമ്പര്‍ വാങ്ങിയാല്‍ പിന്നീട് കെട്ടിടയുടമകള്‍ സുരക്ഷാ മാനദണ്ഡങ്ങളെല്ലാം ലംഘിക്കുന്ന അവസ്ഥയാണുള്ളത്. കെട്ടിടങ്ങളില്‍ പകുതിലേറെയും പ്രവര്‍ത്തിക്കുന്നത് അഗ്‌നിശമന ഉപകരണങ്ങള്‍ പോലുമില്ലാതെയാണ്. പ്രവര്‍ത്തന രഹിതമായതോ ഉപയോഗ ശൂന്യമായതോ ആയ ഉപകരണങ്ങളാണ് പലയിടത്തുമുള്ളത്. 

ഫയര്‍ഫോഴ്‌സ് ഫയര്‍ ഓഡിറ്റ് നടത്തുന്നതിലൂടെയാണ് എന്‍.ഒ.സി പുതുക്കാതെ മാനദണ്ഡങ്ങള്‍ ലംഘിച്ചുകൊണ്ടുള്ള കെട്ടിടങ്ങളെ കണ്ടെത്തുന്നത്. ഫയര്‍ ഓഡിറ്റ് ചെയ്ത് കെട്ടിടയുടമയ്ക്ക് നോട്ടിസ് നല്‍കി ഇക്കാര്യം അതത് തദ്ദേശഭരണസ്ഥാപനങ്ങള്‍ക്ക് റിപ്പോര്‍ട്ടായി ഫയര്‍ഫോഴ്‌സ് കൈമാറും. എന്നാല്‍ നോട്ടിസ് നല്‍കിയാലും കെട്ടിട ഉടമകള്‍ അത് പൂര്‍ണമായും നടപ്പാക്കുന്നില്ല. 

 സൂറത്തിലെ കോച്ചിങ്  സെന്ററിലുണ്ടായ തീപിടുത്തത്തിന്റെ പശ്ചാത്തലത്തില്‍ സംസ്ഥാനത്തും ഫയര്‍ഫോഴ്‌സ് പരിശോധന നടത്തിയിരുന്നു. വ്യാപക ക്രമക്കേടുകള്‍ കണ്ടെത്തി റിപ്പോര്‍ട്ട് സമര്‍പ്പിച്ചെങ്കിലും നടപടികള്‍ ഉണ്ടായിരുന്നില്ല.

ലോക്ക് ഡൗണിന് ശേഷം ക്രമക്കേടുകള്‍ തുടരുന്നുണ്ടോയെന്ന് പരിശോധന നടത്തി വീണ്ടും റിപ്പോര്‍ട്ട് സമര്‍പ്പിക്കാനാണ് ഫയര്‍ഫോഴ്‌സ് തീരുമാനിച്ചത്.