തിരുവനന്തപുരം: കൊവിഡ് ബാധ സമ്പര്‍ക്കത്തിലൂടെ ഇന്ന് പിടികൂടിയത് 27 പേര്‍ക്ക്. സംസ്ഥാനത്തിന്റെ ചരിത്രത്തില്‍ തന്നെ ആദ്യമായാണ് ഇത്രയും പേര്‍ക്ക് സമ്പര്‍ക്കത്തിലൂടെ രോഗം പിടിപെടുന്നത്. എല്ലാ ജില്ലകളിലും രോഗബാധിതര്‍ കൂടിയിട്ടുണ്ട്. ആലപ്പുഴയില്‍ ഇന്ന് രോഗം സ്ഥിരീകരിച്ച 12 പേരില്‍ പതിനൊന്നുപേരും ഒരു കുടുംബത്തിലെ അംഗങ്ങളാണ്. കായംകുളത്തെ വ്യാപാരിയുടെ കുടുംബം ആണിത്.

തിരുവനന്തപുരം ജില്ലയില്‍ രണ്ട് പേര്‍ക്ക് ഇന്ന് സമ്പര്‍ക്കം മൂലം രോഗം ബാധിച്ചു. 46 കാരനായ എസ്.എ.പി ക്യാംപിലെ പൊലിസ് ഉദ്യോഗസ്ഥനാണ് ഇവരിലൊരാള്‍. ഏറ്റവും കൂടതല്‍ കൊവിഡ് കേസുകള്‍ റിപ്പോര്‍ട്ട് ചെയ്ത മലപ്പുറം ജില്ലയില്‍ മൂന്ന് പേര്‍ക്ക് സമ്പര്‍ക്കത്തിലൂടെയാണ് രോഗബാധയുണ്ടായത്. ഇവരില്‍ ഒരു വയസുള്ള കുട്ടിയും ആരോഗ്യ പ്രവര്‍ത്തകയുമുണ്ട്.

കോഴിക്കോട് ഒരാള്‍ക്ക് സമ്പര്‍ക്കത്തിലൂടെയാണ് രോഗം പടര്‍ന്നത്. എറണാകുളം ജില്ലയില്‍ മൂന്ന് പേര്‍ക്ക് സമ്പര്‍ക്കം വഴി രോഗമുണ്ടായി. പിറവത്ത് ദില്ലിയില്‍ നിന്നും എത്തിയ 11 മാസം പ്രായമുള്ള കുഞ്ഞിനും,രണ്ട് വയസ്സുള്ള കുട്ടിയുടെ ബന്ധുക്കള്‍ക്കുമാണ് രോഗം. ബെംഗളൂരുവില്‍ നിന്നെത്തിയ പൈങ്ങോട്ടൂര്‍ സ്വദേശിയുടെ ബന്ധുവിനുമാണ് സമ്പര്‍ക്കത്തിലൂടെ രോഗം പകര്‍ന്നത്. കോട്ടയം ജില്ലയിലെ 14പേരില്‍ 11 പേര്‍ക്ക് രോഗ ലക്ഷണങ്ങളുണ്ടായിരുന്നില്ല.