പെരിന്തല്‍മണ്ണ: കിണറ്റില്‍ വീണയാള്‍ക്ക് രക്ഷകരായി ഒരുകൂട്ടം യുവാക്കള്‍. ഏലംകുളം നെല്ലായ റേഷന്‍കടക്കു സമീപം അബദ്ധത്തില്‍ കിണറ്റില്‍ വീണയാളെ കരക്കെത്തിച്ചത് വിവാഹ ചടങ്ങില്‍ പങ്കെടുക്കാന്‍ അതുവഴി പോവുകയായിരുന്ന യുവാക്കള്‍. പാലാത്തോളില്‍ നിന്നും വരനോടൊപ്പം ചെര്‍പ്പുളശ്ശേരിയിലെ വധുവിന്റെ വീട്ടിലേക്കു പോവുകയായിരുന്നു ഇവര്‍. കിണറ്റില്‍ വീണയാളുടെ സഹോദരനാണ് റോഡിലിറങ്ങി കിണറ്റില്‍ വീണയാളെ രക്ഷപ്പെടുത്താന്‍ സഹായം ചോദിച്ചത്.
ഉടന്‍ വണ്ടി നിര്‍ത്തി കയറും കോണിയുമുപയോഗിച്ച് കിണറ്റില്‍ വീണയാളെ കരക്കെത്തിക്കുകയായിരുന്നു.
റോഡപകടങ്ങളില്‍പെട്ടും മറ്റും രക്ഷിക്കാനാളില്ലാതെ ആളുകള്‍ മരണത്തിനു കീഴടങ്ങേണ്ടി വരുന്ന പുതിയ കാലത്ത് മനുഷ്വത്വത്തിന് പുതിയ മാതൃക സൃഷ്ടിച്ചിരിക്കുകയാണ് അക്ബര്‍, ശരീഫ്, റഹീം , ഷബീര്‍ എന്നീ യുവാക്കള്‍.