വടകര: കാലിക്കറ്റ് സര്‍വകലാശാല ബി.സോണ്‍ കലോത്സവത്തിന്റെ സ്റ്റേജിന മത്സരങ്ങള്‍ക്ക് വടകരയില്‍ മികവാര്‍ന്ന തുടക്കം. രാവിലെ 10ഓടെ ആരംഭിച്ച മത്സരങ്ങള്‍ രാത്രി വൈകിയും നീണ്ടു. പ്രധാന വേദിയായ എം.യു.എം സ്‌കൂള്‍ ഗ്രൗണ്ടില്‍ നടന്ന മാപ്പിളപ്പാട്ട് മത്സരം വലിയ ജനപങ്കാളിത്തം കൊണ്ട് ശ്രദ്ധേയമായി. അഞ്ചു വേദികളിലായി നടക്കുന്ന മത്സരങ്ങളില്‍ സംഘാടന മികവും പ്രകടമായിരുന്നു.
നാട്ടുകാരുടെ വലിയതോതിലുള്ള സാന്നിധ്യമാണ് കലോത്സവത്തെ കൂടുതല്‍ ജനകീയമാക്കുന്നത്. കഴിഞ്ഞ രണ്ടു ദിവസങ്ങളിലായി വടകര എം.ഇ.എസ് കോളജില്‍ നടന്ന സ്റ്റേജിതര മത്സരങ്ങളുട ഫലം പുറത്തു വന്നപ്പോള്‍ ഫാറൂഖ് കോളജ് തൊട്ടടുത്തുള്ള സെന്റ് ജോസഫ് ദേവഗിരിയെക്കാള്‍ ബഹുദൂരം മുന്നിലാണ്. സ്റ്റേജിതര മത്സരയിനങ്ങളില്‍ നിന്ന് ഫാറുഖ് കോളജ് 127 പോയിന്റും ദേവഗിരി 82 പോയന്റും ഗവ. ലോകോളജ് 43 ഉം പ്രൊവിഡന്‍സ് 21 ഉം പോയന്റും നേടി.
ഗവ. ലോ കോളജിലെ ഖലീല്‍ ഇബ്രാഹിം സര്‍ഗ പ്രതിഭയായും ദേവഗിരി കോളജിലെ ആഷിസ് ജോസ് ചിത്ര പ്രതിഭയായും തിരഞ്ഞെടുക്കപ്പെട്ടു. ഇന്നലെ നടന്ന സ്റ്റേജിതര മത്സരങ്ങളിലും ഫാറൂഖ് കോളജ് മികച്ച മുന്നേറ്റമാണ് കാഴ്ചവച്ചത്.