അബൂദബി: പ്രധാനമന്ത്രി നരേന്ദ്ര മോദിക്ക് യു.എ.ഇയുടെ പരമോന്നത ബഹുമതിയായ സായിദ് പുരസ്‌കാരം. ഇന്ത്യയുടെയും യു.എ.ഇയുടെയും ഇടയിലെ ബന്ധം ശക്തിപ്പെടുത്തുന്നതിനായുള്ള മോദിയുടെ പ്രവര്‍ത്തനങ്ങള്‍ പരിഗണിച്ചാണ് ബഹുമതി. മികച്ച സേവനം ചെയ്യുന്ന രാഷ്ട്രത്തലവന്മാര്‍ക്ക് യു.എ.ഇ പ്രസിഡന്റ് നല്‍കുന്ന ആദരമാണ് സായിദ് മെഡല്‍. യു.എ.ഇയുടെ ഏറ്റവും അടുത്ത സുഹൃത്ത് എന്ന് നരേന്ദ്ര മോദിയെ വിശേഷിപ്പിച്ചു കൊണ്ട് അബൂദബി കിരീടാവകാശിയും യു.എ.ഇ സായുധ സേനകളുടെ ഉപ സര്‍വ സൈന്യാധിപനുമായ ശൈഖ് മുഹമ്മദ് ബിന്‍ സായിദ് അല്‍ നഹ്‌യാന്‍ ആണ് പുരസ്‌കാര പ്രഖ്യാപനം നടത്തിയത്. റഷ്യന്‍ പ്രസിഡന്റ് വ്‌ളാദ്മിര്‍ പുടിന്‍, ചൈനീസ് പ്രസിഡന്റ് ഷി ജിന്‍പിങ്, എലിസബത്ത് രാജ്ഞി തുടങ്ങിയവര്‍ക്കും മുന്‍പ് സായിദ് പുരസ്‌കാരം ലഭിച്ചിട്ടുണ്ട്.

പ്രധാനമന്ത്രിയായി അധികാരമേറ്റെടുത്തതിന് ശേഷം നരേന്ദ്ര മോദി രണ്ട് തവണ യു.എ.ഇ സന്ദര്‍ശിച്ചിരുന്നു. 2017ലെ റിപബ്ലിക്ക് ദിന അതിഥിയായി ശൈഖ് മുമ്മദ് ബിന്‍ സായിദ് അല്‍ നഹ്‌യാന്‍ ഇന്ത്യ സന്ദര്‍ശിച്ചിരുന്നു. പുരസ്‌കാര പ്രഖ്യാപനത്തില്‍ മോദി സായിദ് അല്‍നഹ്‌യാനെ ട്വിറ്ററിലൂടെ നന്ദി അറിയിച്ചു.