സ്വന്തം ലേഖകന്‍

തിരുവനന്തപുരം: യു.ഡി.എഫില്‍ നിന്നും പുറത്താക്കപ്പെട്ട കേരള കോണ്‍ഗ്രസ് ജോസ് കെ.മാണി പക്ഷവുമായി അങ്ങോട്ടു പോയൊരു ചര്‍ച്ച വേണ്ടെന്നു സി.പി.എം സംസ്ഥാന സെക്രട്ടേറിയറ്റ്. ജോസ് പക്ഷം ഇതുവരെ ശരിയായൊരു രാഷ്ട്രീയ നിലപാട് സ്വീകരിച്ചിട്ടില്ല. ഇപ്പോഴും യു.ഡി.എഫ് നേതാക്കള്‍ അവരുമായി ചര്‍ച്ച നടത്തുകയാണ്. പുറത്താക്കിയെന്നും പുറത്താക്കിയിട്ടില്ലെന്നും പറയുന്ന സാഹചര്യത്തില്‍ യു.ഡി.എഫിലേക്കുള്ള ജോസ് പക്ഷത്തിന്റെ തിരിച്ചുപോകലും സാധ്യമാണ്. രണ്ടു തെരഞ്ഞെടുപ്പുകള്‍ മുന്നിലുള്ളതിനാല്‍ യു.ഡി.എഫ് സംവിധാനത്തെ കഴിയുന്നത്ര ദുര്‍ബലപ്പെടുത്തുന്നത് ഇടതുമുന്നണിക്കു ഗുണകരമാണെന്നും ജോസ് വിഭാഗം ആഗ്രഹം പ്രകടിപ്പിച്ചാല്‍ എല്‍.ഡി.എഫിലെ എല്ലാ പാര്‍ട്ടികളുമായും ചര്‍ച്ച ചെയ്ത ശേഷം ഉചിതമായ തീരുമാനമെടുക്കണമെന്നും ഇന്നലെ ചേര്‍ന്ന സി.പി.എം സംസ്ഥാന സെക്രട്ടേറിയറ്റില്‍ ധാരണയായി. 

കേരള കോണ്‍ഗ്രസ് ജോസ് പക്ഷവുമായി സി.പി.എം ഇതുവരെയും ഒരു ചര്‍ച്ചയും നടത്തിയിട്ടില്ലെന്നും അവരുടെ രാഷ്ട്രീയ നിലപാടു നോക്കിയായിരിക്കും ഇടതുമുന്നണിയുടെ സമീപനമെന്നും സംസ്ഥാന സെക്രട്ടേറിയറ്റിനു ശേഷം സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ വാര്‍ത്താസമ്മേളനത്തില്‍ പറഞ്ഞു. യു.ഡി.എഫ് ശിഥിലമായ അവസ്ഥയിലാണ്. ആദ്യം പുറത്താക്കിയെന്ന് പറഞ്ഞ കേരളാ കോണ്‍ഗ്രസ് ജോസ് കെ. മാണി വിഭാഗത്തെ പുറത്താക്കിയിട്ടില്ല മാറ്റി നിര്‍ത്തിയിട്ടേ ഉള്ളു എന്ന് രണ്ടാമത് തിരുത്തി. ഭയപ്പെടുത്തി വശത്താക്കാം എന്നാണ് യു.ഡി.എഫ് കരുതിയത്. എന്നാല്‍ അതിന് വിപരീതമായ സാഹചര്യമാണ് നിലവിലുള്ളത്. അദ്ദേഹം പറഞ്ഞു.

 ഇന്നത്തെ സാഹചര്യത്തില്‍ ഇടതുമുന്നണി സംവിധാനം ശക്തമാണ്. വര്‍ഗീയ ശക്തികളുമായി കൈകോര്‍ത്തു സംസ്ഥാനത്തു വര്‍ഗീയ ധ്രുവീകരണമുണ്ടാക്കാനാണ് യു.ഡി.എഫ് ശ്രമിക്കുന്നത്. ഇതിന്റെ ഭാഗമായാണ് ജമാഅത്ത് ഇസ്‌ലാമിയും എസ്.ഡി.പി.ഐയുമായി മുസ്‌ലിം ലീഗ് ബന്ധം സ്ഥാപിക്കുന്നത്. ഈ കൂട്ടുകെട്ടിന്റെ ആപത്ത് സമസ്ത കേരള ജംഇയ്യത്തുല്‍ ഉലമ പോലുള്ള മുസ്‌ലിം സംഘടനകള്‍ തന്നെ ചൂണ്ടിക്കാട്ടിയിട്ടുണ്ട്. കോണ്‍ഗ്രസിന്റെ അനുഗ്രഹാശിസുകളോടെയാണ് ജമാഅത്ത് ഇസ്‌ലാമിയുമായും എസ്.ഡി.പി.ഐയുമായും ലീഗ് കൂട്ടുകൂടുന്നതെന്നും അദ്ദേഹം ആരോപിച്ചു. രാഹുല്‍ ഗാന്ധിയും എ.കെ ആന്റണിയും കെ.സി വേണുഗോപാലും അറിഞ്ഞുകൊണ്ടാണ് ഇങ്ങനെയൊരു ബന്ധമെങ്കില്‍ കോണ്‍ഗ്രസ് ഹൈക്കമാന്റ് നിലപാടു വ്യക്തമാക്കണമെന്നും കോടിയേരി ആവശ്യപ്പെട്ടു.