ലാഹോര്‍: പാകിസ്താനിലെ പഞ്ചാബില്‍ റെയില്‍വേ ക്രോസിങ്ങില്‍ വച്ച് മിനി ബസ് പാസഞ്ചര്‍ ട്രെയിനുമായിടിച്ച് 19 സിഖ് തീര്‍ത്ഥാടകര്‍ ഉള്‍പ്പെടെ 29 പേര്‍ മരിച്ചു. 

പെഷവാറില്‍ നിന്നുള്ള സിഖുകാരാണ് മരിച്ചത്. ഇവര്‍ സഞ്ചരിച്ച മിനി ബസ് ഫറൂഖാബാദിലെ സച്ച സൗദ ഗുരുദ്വാരയില്‍ നിന്നും പഞ്ചാബിലെ നാന്‍കന സാഹെബ് ഗുരുദ്വാരയിലേക്ക് മടങ്ങുമ്പോഴാണ് അപകടത്തില്‍ പെട്ടത്. കറാച്ചിയില്‍ നിന്ന് ലാഹോറിലേക്ക് പോകുന്നതിനിടെ ഉച്ചയ്ക്ക് 1.30ഓടെ ശെയ്ഖ്പുര ജില്ലയിലെ ആളില്ലാ റെയില്‍വേ ക്രോസിങ്ങില്‍ വച്ച് ഷാ ഹുസൈന്‍ എക്‌സ്പ്രസില്‍ ഇടിക്കുകയായിരുന്നു. 

ഇതുമായി ബന്ധപ്പെട്ട് റെയില്‍വേ ഡിവിഷനല്‍ എന്‍ജിനിയറെ സസ്‌പെന്‍ഡ് ചെയ്തിട്ടുണ്ട്. അപകടത്തിനുത്തരവാദികളായവര്‍ക്കെതിരേ നടപടിയെടുക്കാന്‍ റെയില്‍വേ മന്ത്രി ശെയ്‌റ് റാഷിദ് ഉത്തരവിട്ടു. സിഖ് തീര്‍ത്ഥാടകരുടെ മരണത്തില്‍ പ്രധാനമന്ത്രി നരേന്ദ്ര മോദിയും പാക് പ്രധാനമന്ത്രി ഇമ്രാന്‍ ഖാനും അനുശോചിച്ചു.