ജിദ്ദ: ആടു ജീവിതത്തിലെ നജീബ്മാരുടെയും തൊഴിലാളികളെ ചൂഷണം ചെയ്യുന്ന സ്‌പോണ്‍സര്‍മാരുടെയും മാത്രം കഥയല്ല പ്രവാസികള്‍ക്ക് പറയാനുള്ളത്. അറബികളുടെ സ്‌നേഹം മതിയാവോളം അനുഭവിക്കുന്നവരുടെയും കഥകളുണ്ടിവിടെ.
അതില്‍ ഒന്നാണ് സലീമിന്റെ ജീവിതകഥ. തന്റെ മലയാളിയായ തൊഴിലാളി ജോലിക്കിടെ തളര്‍ന്നു വീണപ്പോള്‍ തുണയാകുകയും സംരക്ഷണം നല്‍കുകയും ചെയ്ത സഊദി സ്‌പോണ്‍സറുടെ കാരുണ്യമാണിപ്പോള്‍ സലീമിന്റെ ജീവിതം ബാക്കിയാക്കിയിരിക്കുന്നത്.
38 വര്‍ഷങ്ങള്‍ക്ക് മുന്‍പ് സഫ്‌വയിലെ ഒരു വീട്ടില്‍ ജോലിക്കെത്തുകയും തോട്ടം ജോലികളിലും മറ്റു ജോലികളിലും വ്യാപൃതനാകുകയും ചെയ്ത തൃശൂര്‍ സ്വദേശി സലീമിനാണു തന്റെ കഫീലിന്റെ പരിചരണവും സ്‌നേഹവും നേരിട്ടനുഭവിക്കാനായത്.
ആദ്യത്തെ സ്‌പോണ്‍സര്‍ക്കൊപ്പം സലീം നീണ്ട 28 വര്‍ഷം സേവനം ചെയ്തു. ഒരിക്കല്‍ നാട്ടിലെത്തിയപ്പോള്‍ രോഗം കാരണം തിരികെ വരാന്‍ സാധിച്ചില്ല.
ഈ സമയം സ്‌പോണ്‍സര്‍ മരിച്ചു. തുടര്‍ന്ന് നാട്ടില്‍ നിന്ന് സ്‌പോണ്‍സറുടെ മകനായ അബ്ദുല്ല സഅദുമായി ഫോണില്‍ ബന്ധപ്പെടുകയും മകന്‍ പുതിയ വിസ അയച്ചു കൊടുക്കുകയുമായിരുന്നു.
കഴിഞ്ഞ 10 വര്‍ഷമായി അബ്ദുല്ല സഅദിന്റെ കീഴിലാണ് സലീം ജോലി ചെയ്തു കൊണ്ടിരുന്നത്.
അബ്ദുല്ല സഅദിന്റെ കുട്ടിക്കാലത്തായിരുന്നു സലീം ആദ്യ തവണ ആ വീട്ടില്‍ ജോലിക്കെത്തിയിരുന്നത്. അതുകൊണ്ട് തന്നെ പിതൃതുല്യമായ ബഹുമാനമായിരുന്നു സലീമിന് അബ്ദുല്ല സഅദ് നല്‍കിയിരുന്നത്.
മൂന്ന് മാസം മുന്‍പ് സലീം തളര്‍ന്നു വീണപ്പോള്‍ സ്‌പോണ്‍സര്‍ അബ്ദുല്ല സഅദ് സലീമിന് ആശുപത്രികളില്‍ എത്തിച്ച് ചികിത്സ നല്‍കുകയും തുടര്‍ന്ന് സ്വന്തം വീട്ടില്‍ തന്നെ പരിചരണം ഒരുക്കുകയും ചെയ്തു. തളര്‍ന്നു കിടന്നിരുന്ന സലീമിനെ താങ്ങിയെടുത്ത് കുളിപ്പിക്കുന്നത് വരെ കഫീലും മക്കളുമായിരുന്നു എന്നത് ആ സ്‌നേഹത്തിന്റെ ആഴം വ്യക്തമാക്കുന്നു. തന്റെ പിതാവിന്റെ സ്ഥാനത്താണ് സലീമിനെ കാണുന്നതെന്നും അദ്ദേഹത്തെ പരിചരിക്കല്‍ തങ്ങളുടെ കടമയാണെന്നുമാണ് സ്‌പോണ്‍സര്‍ ഇതിനെക്കുറിച്ച് പറഞ്ഞത്.
രോഗാവസ്ഥയില്‍ മാറ്റം വരുന്നില്ല എന്ന് കണ്ടപ്പോള്‍ സലീം തന്നെയാണ് തന്നെ നാട്ടിലേക്ക് പറഞ്ഞയക്കാന്‍ അബ്ദുള്ളയോട് ആവശ്യപ്പെട്ടത്. തെല്ലൊരു വിഷമത്തോടെ അബ്ദുല്ല ആ ആവശ്യം അംഗീകരിക്കുകയായിരുന്നു.
സാമൂഹിക പ്രവര്‍ത്തകനായ നാസ് വക്കത്തിന്റെ സഹായത്തോടെ കഴിഞ്ഞ ദിവസം ദമ്മാമില്‍ നിന്നും കൊച്ചിയിലേക്കുള്ള നോര്‍ക്ക ഹെല്‍പ്പ് ഡെസ്‌കിന്റെ വിമാനത്തില്‍ സലീം നാട്ടിലേക്ക് മടങ്ങി. തൃശൂര്‍ സ്വദേശികളായ മലയാളികളുടെ കൂട്ടായ്മയായ തൃശൂര്‍ നാട്ടുകൂട്ടം അംഗങ്ങള്‍ക്കിടയില്‍ നിന്നും സ്വരൂപിച്ച ഒന്നര ലക്ഷം രൂപ നല്‍കിയാണ് സലീമിനെ യാത്രയാക്കിയത്.