കൊച്ചി: മഹാരാജാസ് കോളജില്‍ ഒന്നാം വര്‍ഷ ബിരുദ ക്ലാസുകള്‍ ഇന്ന് ആരംഭിക്കും. കഴിഞ്ഞ തിങ്കളാഴ്ചയായിരുന്നു ക്ലാസുകള്‍ ആരംഭിക്കേണ്ടത്. എന്നാല്‍ കോളജിലെ വിദ്യാര്‍ഥി അഭിമന്യു കൊല്ലപ്പെട്ടതിനെത്തുടര്‍ന്ന് ഒരാഴ്ചത്തേക്ക് ക്ലാസുകള്‍ നീട്ടിവെച്ചിരിക്കുകയായിരുന്നു. ഒന്നാം വര്‍ഷത്തേക്ക് അഡ്മിഷന്‍ നേടിയ ഫാറൂഖിനെ അഭിമന്യു കൊലക്കേസുമായി ബന്ധപ്പെട്ട് പൊലിസ് അറസ്റ്റ് ചെയ്തിട്ടുണ്ട്.
ക്ലാസുകള്‍ തുടങ്ങുന്നതിന്റെ ഭാഗമായി ഇന്ന് വിദ്യാര്‍ഥികള്‍ക്ക് ബോധവല്‍കരണ പരിപാടി സംഘടിപ്പിക്കുമെന്നു മഹാരാജാസ് കോളജ് പ്രിന്‍സിപ്പല്‍ ഡോ. കൃഷ്ണകുമാര്‍ അറിയിച്ചു. എം.കെ സാനു മുഖ്യപ്രഭാഷണം നടത്തും. കെ.എസ് വിശ്വംഭരന്‍, പി.കെ രവീന്ദ്രന്‍ എന്നിവര്‍ സംസാരിക്കും. കോളജ് ചരിത്രവും പാരമ്പര്യവും വിദ്യാര്‍ഥികളെ അറിയിക്കുന്നതിനാണ് ബോധവല്‍കരണ പരിപാടി. ആഘോഷങ്ങളൊഴിവാക്കും.
അഭിമന്യുവിനു സംഭവിച്ചതുപോലെയുള്ള അനിഷ്ട സംഭവങ്ങള്‍ ഇനി കോളജിലുണ്ടാകാതെ നോക്കുന്നതിനുള്ള നടപടികള്‍ ഊര്‍ജിതമാക്കുമെന്നും അധികൃതര്‍ വ്യക്തമാക്കി. കൊലപാതകവുമായി ബന്ധപ്പെട്ട് ഒരു ദിവസം കോളജിന് അവധി നല്‍കിയിരുന്നു. ബുധനാഴ്ചയാണ് രണ്ടാം വര്‍ഷം മുതലുള്ള ക്ലാസുകള്‍ ആരംഭിച്ചത്.