തുറവൂര്‍: പള്ളിത്തോട് റോഡിലെ പൊട്ടിയ ശുദ്ധജല പൈപ്പിന്റെ തകരാറുകള്‍ പരിഹരിച്ചില്ല.റോഡിലെ താഴ്ന്ന ഭാഗം നികത്തി ടാര്‍ ചെയ്യാന്‍ ജല അതോറിറ്റിയോട് പൊതുമരാമത്ത് വകുപ്പ് ആവശ്യപ്പെട്ടത് 86,500 രൂപ.ഇതോടെ പൈപ്പുകളുടെ അറ്റകുറ്റപ്പണിക്കായി റോഡ് പൊളിക്കുന്ന കാര്യം രണ്ട് വട്ടം ആലോചിക്കണമെന്നാണ് ജല അതോറിറ്റിയുടെ നിലപാട്.
രണ്ടാഴ്ച മുമ്പാണ് തുറവൂര്‍ റെയില്‍വേ ക്രോസിന് കിഴക്ക് ഭാഗത്ത് റോഡിനടിയിലെ പൈപ്പ് പൊട്ടിയത്.നാലു ദിവസത്തെ വിശ്രമമില്ലാത്ത അറ്റകുറ്റപ്പണി നടത്തി സുഗമമാക്കിയതിനു അതോറിറ്റിക്ക് 52,000 രൂപ മാത്രമേ ചെലവായുള്ളു. എന്നാല്‍ പൊതുമരാമത്തിന് കൊടുക്കേണ്ടതുള്‍പ്പെടെ പൈപ്പിന്റെ അറ്റകുറ്റപ്പണി നടത്തിയതിന് ആകെ ചെലവ് 1,38,500 രൂപയുടെ കണക്കായപ്പോള്‍ ജല അതോറിറ്റി അധികൃതര്‍ അന്തം വിട്ടിരിക്കുകയാണ്.
ജലവിതരണം സുഗമമാക്കിയ ആശ്വാസത്തിലിരിക്കുമ്പോള്‍ ആണ് പണം അടയ്ക്കണമെന്ന് കാട്ടി പൊതുമരാമത്ത് വകുപ്പിന്റെ കത്ത് കിട്ടിയത്.ഇതോടെ റോഡ് പൊളിച്ചുള്ള അറ്റകുറ്റപ്പണി നടത്താന്‍ ജല അതോറിറ്റിക്ക് ഭയമായിരിക്കുകയാണ്. ബി.എം.ബി.സി.അനുസരിച്ച് പണിതതാണ് തുറവൂര്‍ കുമ്പളങ്ങി റോഡ്.നിര്‍മാണം കഴിഞ്ഞിട്ട് അധികമായിട്ടില്ല. എസ്റ്റിമേറ്റടുത്തതിന്റെ അടിസ്ഥാനത്തിലാണ് കത്തു നല്‍കുന്നതെന്ന് പൊതുമരാമത്ത് വകുപ്പ് അസി.എക്‌സിക്യൂട്ടീവ് എഞ്ചീനിയര്‍ രാജ ശ്രീ പറഞ്ഞു. പൊളിക്കുന്ന റോഡിന്റെ അറ്റകുറ്റപ്പണിക്കായി ഭീമമായ തുക അടക്കേണ്ടി വരുന്നതില്‍ നിന്ന് ജല അതോറിറ്റിയെ ഒഴിവാക്കണമെന്ന് ജല അതോറിറ്റി അസി. എക്‌സിക്യൂട്ടിവ് എന്‍ജിനീയര്‍ ജോസഫ് പറഞ്ഞു.
ചാവടി പള്ളിത്തോട് റോഡിനടിയിലെ പൈപ്പുപൊട്ടി വെള്ളം പാഴാകുന്നുണ്ട്. ഇവിടെ അറ്റകുറ്റപ്പണി നടത്താന്‍ ജല അതോറിറ്റി മടികാണിക്കുകയാണെന്നാണ് ജനങ്ങള്‍ പറയുന്നത്.ദിവസവും ധാരാളം ലിറ്റര്‍ വെള്ളം പാഴായിട്ടും ഒരു നടപടിയും സ്വീകരിക്കാന്‍ ജല അതോറിറ്റി തയ്യാറാകാത്തതില്‍ ജനങ്ങള്‍ക്ക് ശക്തമായ പ്രതിഷേധമുണ്ട്. അറ്റകുറ്റപ്പണി ഉടനെ നടത്തുമെന്ന് ജലഅതോറിറ്റി അസി: എന്‍ജീനിയര്‍ സിന്ധു സുരേഷ് പറഞ്ഞു.