ന്യൂഡല്‍ഹി: ഡല്‍ഹി മുന്‍സിപ്പല്‍ കോര്‍പ്പറേഷനുകളിലേക്കുള്ള വോട്ടെടുപ്പ് ആരംഭിച്ചു. രാവിലെ ഏഴ് മണിക്കാരംഭിച്ച പോളിങ് വൈകിട്ട് 5 മണിക്ക് അവസാനിക്കും. നോര്‍ത്ത്, ഈസ്റ്റ്, സൗത്ത് എന്നിങ്ങനെ മൂന്ന് മുന്‍സിപ്പല്‍ കോര്‍പ്പറേഷനുകളിലാണ് തെരഞ്ഞെടുപ്പ് നടക്കുന്നത്.

ആംആദ്മിയും ബി.ജെ.പിയും പിന്നെ തിരിച്ചുവരവിനൊരുങ്ങുന്ന കോണ്‍ഗ്രസും ചേര്‍ന്ന് ശക്തമായ ത്രികോണ പോരാട്ടമാണ് ഇന്ന് നടക്കുന്നത്. മൂന്ന് കോര്‍പ്പറേഷനുകളും പത്തു വര്‍ഷമായി ബി.ജെ.പിയാണ് ഭരിക്കുന്നത്. ബി.ജെ.പി ഇക്കുറിയും വമ്പന്‍ വിജയം നേടുമെന്നാണ് പ്രവചനങ്ങള്‍.

ജനസമ്മതി നഷ്ടപ്പെട്ടില്ലെന്ന് തെളിയിക്കേണ്ട ആംആദ്മിയ്ക്കും കോണ്‍ഗ്രസിനും ഇത് അഭിമാന പോരാട്ടമാണ്. രജൗരി ഗാര്‍ഡന്‍ ഉപതെരഞ്ഞെടുപ്പില്‍ ഞെട്ടിക്കുന്ന പരാജയമാണ് ആംആദ്മിക്ക് ഏറ്റുവാങ്ങേണ്ടി വന്നത്.