റിയാദ്: സഊദിയിൽ ചാരായ വാറ്റ് കേസിൽ മലയാളി പോലീസ് പിടിയിൽ. കോഴിക്കോട് സ്വദേശിയാണ് 170 ഓളം മദ്യ കുപ്പികളുമായി കിഴക്കൻ സഊദിയിൽ പോലീസ് പിടിയിലായത്. ചാരായക്കുപ്പികളുമായി പിടിയിലായ സുഹൃത്തി​നെ സഹായിക്കാൻ പണവുമായെത്തിയ മറ്റൊരു മലയാളിയെയും പോലീസ് പിടികൂടി. കൈക്കുലിക്കേസിലാണ് കണ്ണൂർ സ്വദേശിയെ പോലീസ് പിടികൂടിയത്​. ഇരുവരും ഇപ്പോൾ ജയിലിലാണ്. ഒരു മാസത്തിലധികമായി  ഇരുവരുടേയും വിവരങ്ങൾ ലഭ്യമല്ലാതായതോടെ വീട്ടുകാർ സാമൂഹിക പ്രവർത്തകരുടെ സഹായം തേടുകയായിരുന്നു. തുടർന്ന് നടത്തിയ അന്വേഷണത്തിലാണ് ഇരുവരെയും ദമാം സെൻട്രൽ ജയിലിൽ കണ്ടെത്തിയത്. 

 

    ലോക്​ ഡൗൺ കാലത്ത്​ വിദേശ മദ്യങ്ങളുടെ ലഭ്യത കുറഞ്ഞപ്പോൾ ചാരായം വാറ്റി വിൽക്കുന്നതിനിടെയാണ് കോഴിക്കോട് സ്വദേശി​ ആദ്യം പൊലീസ്​  പിടിയിലായത്​. രഹസ്യ വിവരം ലഭിച്ചതിനെ തുടർന്ന്​ പൊലീസ്​ നടത്തിയ നീക്കത്തിലാണ്​​​ 170ഓളം മദ്യക്കുപ്പികളുമായി പിടിയിലായത്​.  ഫെബ്രുവരിയിൽ നാട്ടിൽ അവധികഴിഞ്ഞ്​ എത്തിയ ഇയാൾ ചാരായ കച്ചവടക്കാരുടെ ഏജൻറായി മാറുകയായിരുന്നു. പൊലീസ്​ ജീപ്പിൽ സ്​റ്റേഷനിലേക്ക്​ കൊണ്ടു  പോകുന്നതിനിടെ പണം തന്നാൽ മോചിപ്പിക്കാമോ എന്ന്​ ഇയാൾ പൊലീസുകാരോട്​ ചോദിച്ചു. ഇതിൽ കൗതുകം തോന്നിയ പൊലീസ്​ അയാളുടെ ആവശ്യം  അംഗീകരിച്ചതായി ഭാവിക്കുകയും വിലപേശലുകൾക്കൊടുവിൽ 3,000 റിയാൽ തന്നാൽ മോചിപ്പിക്കാം എന്ന്​ സമ്മതിക്കുന്നതായി ഭാവിക്കുകയും ചെയ്​തു.

 

    ഇതനുസരിച്ച്​  ദമാമിൽ എ.സി വർക്ക്​​ഷോപ്​ നടത്തുന്ന കണ്ണുർ സ്വദേശിയായ സുഹൃത്തിനെ വിളിച്ച്​ പണവുമായി എത്താൻ അറിയിക്കുകയായിരുന്നു. പറഞ്ഞപോലെ  പണവുമായെത്തി കൈമാറിയ യുവാവിനെ കൈക്കൂലി നൽകി സ്വാധീനിക്കാൻ ശ്രമിച്ചു എന്ന കുറ്റം ചുമത്തി അറസ്റ്റ് ചെയ്യുകയായിരുന്നു. കോഴിക്കോട്​ സ്വദേശി മദ്യക്കടത്ത്​ കേസിലും കണ്ണുർ സ്വദേശി കൈക്കൂലി കേസിലുമാണ് ജയിലിൽ കഴിയുന്നത്.