സമസ്ത ജീവജാലങ്ങളുടെയും താളാത്മകമായ പൊരുത്തപ്പെടലിലൂടെ മാത്രമേ മനുഷ്യര്‍ക്ക് ശാന്തിയും സമാധാനവും ഉണ്ടാവുകയുള്ളൂവെന്നു അനാഥരുടെ ജീവിത സംഘര്‍ഷങ്ങളെ ആവിഷ്‌കരിക്കുന്ന ഈ നോവലിലൂടെ ഗ്രന്ഥകര്‍ത്താവ് അടിവരയിടുന്നു. മാതാപിതാക്കള്‍ നഷ്ടപ്പെട്ടതിനാല്‍ അനാഥാലയത്തില്‍ ജീവിക്കേണ്ടിവന്ന രാമാനുജനും ധനലക്ഷ്മിയുമാണ് ഈ നോവലിലെ പ്രധാന കഥാപാത്രങ്ങള്‍. 

സ്വന്തം വീടും ചുമന്ന് ദീര്‍ഘകാലം ജീവിക്കുന്ന ആമകള്‍പോലും ഒരുമാളത്തിന്റെ സുരക്ഷിതത്വത്തിലാണ് ശിശുക്കള്‍ക്ക് ജന്മംനല്‍കുന്നതെന്ന് അവതാരികയില്‍ എ. മോഹന്‍കുമാര്‍ പറഞ്ഞുവയ്ക്കുന്നു. സിംഹവും കടുവയും വരെ കുഞ്ഞുങ്ങളുടെ സുരക്ഷിതത്വത്തിനായി ഒരു ഗുഹയോ, മടയോ തിരഞ്ഞെടുക്കുന്നുണ്ടെന്നതും പ്രകൃതിയുടെ ഭാഗമാണ്. 'ജൈവം' ഉള്‍പ്പെടെയുള്ള കൃതികള്‍ രചിച്ച ഗ്രന്ഥകാരന്റെ ഹരിതാന്വേഷണങ്ങളുടെ തുടര്‍ച്ചയാണ് ഈ സൃഷ്ടി.