മുതലമട: ചുള്ളിയാര്‍ ഡാമിനരുകില്‍ നിയമം ലംഘിച്ച് പ്രവര്‍ത്തിക്കുന്ന ഫാക്ടറിക്കെതിരേ നടപടിയെടുക്കണമെന്ന് പരിസ്ഥിതി സംഘടനകള്‍. ചുള്ളിയാര്‍ ഡാമിനരികിലാണ് 20 ഏക്കറോളം പ്രദേശത്ത് കെട്ടിട നിര്‍മാണ സാമഗ്രികള്‍ നിര്‍മ്മിക്കുന്ന ഫാക്ടറിയുടെ പ്രവര്‍ത്തനം ആരംഭിച്ചിട്ടുള്ളത്. കഴിഞ്ഞ രണ്ട് വര്‍ഷത്തോളമായി നിരവധി പരാതികള്‍ നിലനില്‍ക്കുന്നുണ്ടെങ്കിലും പ്രവര്‍ത്തനം തുടരുകയാണ്. ഡാമിന്റെ പരിസരങ്ങളില്‍ നിശ്ചിത ദൂരപരിധിക്കകത്ത് കെട്ടിട നിര്‍മാണങ്ങള്‍ നടത്തരുതെന്നാവശ്യപ്പെട്ട് നിരവധി പരാതികള്‍ ഇറിഗേഷന്‍ വകുപ്പിന് നല്‍കിയിട്ടും നടപടി ഉണ്ടായില്ലെന്ന് നാട്ടുകാര്‍ പറയുന്നു. കേന്ദ്ര പ്രതിരോധ നിയമപ്രകാരം ദൂരപരിധി ഓരോ ഡാമുകള്‍ക്കും വെവ്വേറെ നിര്‍ണയിച്ച് പട്ടികയുണ്ട്. അത് പ്രകാരം നിര്‍മാണത്തിന് എക്‌സി.എന്‍ജിനീയറുടെ അനുമതി വേണമെന്നാണ് നിബന്ധന. എന്നാല്‍ ഇത്തരം ഉത്തരവില്‍ ചുള്ളിയാര്‍ ഡാം ഉള്‍പ്പെട്ടിട്ടില്ലെന്ന് ഇറിഗേഷന്‍ ഉദ്യോഗസ്ഥര്‍ പറഞ്ഞു.
ഉത്തരവ് ഇറങ്ങിയതിന് ശേഷമാണ് ചുള്ളിയാര്‍ ഡാം നിര്‍മിച്ചത് എന്നാണ് അധികൃതരുടെ ഭാഷ്യം. ഫാക്ടറി നിര്‍മാണത്തിന് നിലവില്‍ പഞ്ചായത്ത് അനുവാദം നല്‍കരുതെന്ന് നാട്ടുകാര്‍ ആവശ്യപ്പെട്ടു. നാട്ടുകാരുടെ പരാതി ഇറിഗേഷന്‍ വകുപ്പ് ഡാം സേഫ്റ്റി അതോറിറ്റിയെ അറിയിച്ചിട്ടുണ്ടെങ്കിലും മറുപടി കിട്ടിയിട്ടില്ല. ഇതിനിടെ ഇറിഗേഷന്റെ സ്ഥലം മണ്ണിട്ടു നികത്തിയ ഫാക്ടറിക്കെതിരേ നടപടിയെടുക്കണമെന്ന് പരിസരവാസികള്‍ നല്‍കിയ പരാതിയും പരിഗണിക്കപ്പെട്ടിട്ടില്ല. ഫാക്ടറി കെട്ടിടത്തിന് നിലവില്‍ അതോറ്റിയുടേയോ എക്‌സി.എന്‍ജിനീയറുടേയോ അനുമതി നിര്‍മാതാക്കള്‍ക്ക് ലഭിച്ചിട്ടില്ലെന്നും പഞ്ചായത്ത് ഉള്‍പ്പെടെ അനുമതി നല്‍കാത്തതിനെതിരേ നിര്‍മാതാക്കള്‍ ഹൈക്കോടതിയില്‍ നിയമനടപടിയിലേക്ക് നീങ്ങിയതായും ഇതിനെതിരേ ഇറിഗേഷന്‍,കൃഷി വകുപ്പ്, തദ്ദേശ വകുപ്പുകള്‍ നിയമനടപടിയിലേക്ക് നീങ്ങണമെന്നുമാണ് പരിസ്ഥിതി സംഘടനകളുടെ ആവശ്യം.