ഗൂഡല്ലൂര്‍: മുതുമല കടുവാസങ്കേത പരിധിയിലെ നമ്പിക്കുന്നില്‍ കാട്ടാനയിറങ്ങി നേന്ത്രവാഴ കൃഷി നശിപ്പിച്ചു.
നമ്പിക്കുന്ന് ഗ്രാമത്തിലിറങ്ങിയ കാട്ടാന വിനായകന്‍, വേലായുധന്‍ എന്നവരുടെ വാഴ കൃഷിയാണ് നശിപ്പിച്ചത്. കോയമ്പത്തൂര്‍ ഭാഗത്ത് മാസങ്ങള്‍ക്ക് മുന്‍പ് കാര്‍ഷിക വിളകള്‍ നശിപ്പിച്ച് ജനങ്ങളെ ഭീതിപ്പെടുത്തിയ വിനായകന്‍ എന്ന കാട്ടാനയെ വനം വകുപ്പ് പിടികൂടി മുതുമല കടുവാസങ്കേതത്തില്‍ വിട്ടിരുന്നു.
വനത്തില്‍ ചുറ്റിത്തിരിയുന്ന വിനായകന്‍ മുതുമല പഞ്ചായത്തിലെ നാഗംപള്ളി, മുതുകുളി, പുലിയാളം, മണ്ടക്കര, കോലിമല തുടങ്ങിയ കാര്‍ഷിക മേഖലകളില്‍ വ്യാപകമായാണ് നാശം വിതക്കുന്നത്. ഏതാണ്ട് 300 വാഴകളാണ് നശിപ്പിച്ചത്. വനത്തിലേക്ക് പോകാതെ ഗ്രാമങ്ങളില്‍ ചുറ്റിത്തിരിയുന്ന വിനായകന്‍ എന്ന കാട്ടാനയെ പ്രതിരോധിക്കാന്‍ വനംവകുപ്പ് നടപടി സ്വീകരിക്കണമെന്ന് ഗ്രാമവാസികള്‍ ആവശ്യപ്പെട്ടു.