വാടാനപ്പള്ളി : കണ്ടശാംകടവ് കനോലിക്കനാലില്‍ മൂന്നോണ നാളില്‍ നടക്കുന്ന മിനിസ്റ്റേഴ്‌സ് എവര്‍ റോളിങ് ട്രോഫിക്ക് വേണ്ടിയുള്ള ജലോത്സവത്തില്‍ ഇത്തവണയും ചുണ്ടന്‍ വള്ളങ്ങള്‍ എത്തും.
ആലപ്പുഴയില്‍ നിന്നും പത്തോളം ചുണ്ടന്‍ വള്ളങ്ങളെയും ചുരുളന്‍, ഇരുട്ടി കുത്തി വിഭാഗങ്ങളെയും പങ്കെടുപ്പിച്ചുള്ള ജലമേളയും സാംസ്‌കാരിക പരിപാടികളും നടത്തുവാന്‍ കണ്ടശ്ശാം കടവില്‍ ചേര്‍ന്ന സംഘാടക സമിതി യോഗം തീരുമാനിച്ചു.
മണലൂര്‍, വാടാനപ്പള്ളി പഞ്ചായത്തുകളുടെയും അന്തിക്കാട്, തളിക്കുളം, ബ്ലോക്ക് പഞ്ചായത്തുകളുടെയും ജില്ലാ പഞ്ചായത്തിന്റെയും ടൂറിസം വകുപ്പിന്റെയും സഹകരണത്തോടെയാണ് ജലോത്സവ പരിപാടികള്‍ സംഘടിപ്പിക്കുന്നത്. യോഗം മുരളി പെരുനെല്ലി എം.എല്‍.എ ഉദ്ഘാടനം ചെയ്തു. മണലൂര്‍ പഞ്ചായത്ത് പ്രസിഡന്റ് വിജി ശശി അധ്യക്ഷനായി.
അരിമ്പൂര്‍ പഞ്ചായത്ത് പ്രസിഡന്റ് സുജാത മോഹന്‍ ദാസ്, തളിക്കുളം ബ്ലോക്ക് പഞ്ചായത്ത് പ്രസിഡന്റ് സുഭാഷിണി മഹാദേവന്‍, ജില്ലാ പഞ്ചായത്തംഗം സിജി മോഹന്‍ ദാസ്, അന്തിക്കാട് പഞ്ചായത്ത് പ്രസിഡന്റ് എ.വി ശ്രീവത്സന്‍, സീത ഗണേഷ്, എം.കെ സദാനന്ദന്‍, വി.ജി അശോകന്‍, കെ.വി വിനോദന്‍, ജനാര്‍ദ്ദനന്‍ മണ്ണുമ്മല്‍ സംസാരിച്ചു.