പയ്യോളി: പയ്യോളി ബിവറേജിന് മുന്നില്‍ മദ്യപാനികളുടെ വിളയാട്ടത്തില്‍ ഡയാലിസിസ് ചെയ്തുകൊണ്ടിരിക്കുന്ന രോഗിക്ക് മര്‍ദനമേറ്റു. കണ്ണംപള്ളി ഡെല്‍സന് ആണ് മര്‍ദനമേറ്റത്. മണിയൂര്‍ സ്വദേശികളായ കാഞ്ഞിരംകുളത്ത് ജിതേഷ്, സബീഷ് എന്നിവരെ പയ്യോളി പൊലിസ് അറസ്റ്റ് ചെയ്തു.
ഇന്നലെ വൈകിട്ട് 3ന് ബിവറേജിന് തൊട്ടടുത്ത വീടിന് മുന്നില്‍ മൂത്രമൊഴിക്കുന്നത് ചോദ്യം ചെയ്തതിനാണ് ഡെല്‍സനെ മര്‍ദിച്ചത്. വീട്ടില്‍ കയറി സ്ത്രീകളടക്കമുള്ളവരുടെ മുന്നില്‍വച്ച് അസഭ്യ വര്‍ഷം നടത്തിയതിന് ശേഷം ഡെല്‍സനെ മര്‍ദിക്കുകയായിരുന്നു.
ബിവറേജസ് ഷോപ്പില്‍ നിന്നും മദ്യപിക്കുന്നവര്‍ പ്രദേശത്ത് സ്ഥിരമായി പ്രശ്‌നങ്ങള്‍ ഉണ്ടാക്കുന്നുണ്ട്. ഇതിന് അടിയന്തരമായി നിര്‍ത്താന്‍ പൊലിസും എക്‌സൈസ് വകുപ്പും തയാറാകണമെന്നാണ് നാട്ടുകാരുടെ ആവശ്യം.
ഇവിടെവച്ച് പരസ്യമായി മദ്യപിക്കുന്നത് സമീപത്തെ കച്ചവടക്കാര്‍ക്കും വീട്ടുകാര്‍ക്കും ഒരുപോലെ ബുദ്ധിമുട്ടാണ്. പയ്യോളി ടൗണിന് പിന്നിലെ ബിവറേജസ് ഷോപ്പിനു മുന്നില്‍ നടക്കുന്ന പരസ്യ മദ്യപാനത്തിനെതിരേയും സാമൂഹ്യ വിരുദ്ധരുടെ അക്രമങ്ങള്‍ക്കെതിരേയും പൊലിസ് നടപടിയെടുക്കുന്നില്ലെന്ന് പരാതിയുണ്ട്.