സ്വന്തം ലേഖകന്‍
മനാമ: ബഹ്‌റൈനില്‍ നിന്നുള്ള ആദ്യത്തെ സൗജന്യ ചാര്‍ട്ടേഡ് വിമാനം കോഴിക്കോട് വിമാനത്താവളത്തിലെത്തി. ബഹ്‌റൈനിലെ പ്രവാസി മലയാളി സംഘടനകളും സാമൂഹികപ്രവര്‍ത്തകരും ചേര്‍ന്നാണ് വിമാനം ചാര്‍ട്ട് ചെയ്തത്. 181 യാത്രക്കാരായിരുന്നു വിമാനത്തിലുണ്ടായിരുന്നത്. ഇതില്‍ നാല് കുട്ടികളും ഉള്‍പ്പെടും.
അര്‍ഹരായ യാത്രക്കാരെ കണ്ടെത്തിയാണ് യാത്രാ സൗകര്യം ഒരുക്കിയതെന്ന് ഭാരവാഹികള്‍ പറഞ്ഞു. വരുംദിവസങ്ങളിലും സമാന പ്രവര്‍ത്തനങ്ങള്‍ തുടരാനാണ് പദ്ധതിയെന്ന് ഗ്രൂപ്പ് കോര്‍ഡിനേറ്ററും മാധ്യമപ്രവര്‍ത്തകനുമായ സിറാജ് പള്ളിക്കര അറിയിച്ചു. പ്രവാസി യാത്രാ മിഷന്‍ എന്ന വാട്‌സ്ആപ്പ് ഗ്രൂപ്പാണ് സൗജന്യ യാത്രാ പദ്ധതി നടപ്പാക്കിയത്.