അങ്കാറ: മാധ്യമപ്രവര്‍ത്തകന്‍ ജമാല്‍ ഖഷോഗി വധത്തിലെ പ്രതികളുടെ വിചാരണ നടപടികള്‍ തുര്‍ക്കി കോടതിയില്‍ ആരംഭിച്ചതോടെ കേസിലെ കൂടുതല്‍ വിശദാംശങ്ങള്‍ പുറത്ത്. ഖഷോഗി തുര്‍ക്കിയിലെ സഊദി കോണ്‍സുലേറ്റില്‍ എത്തിയതിനു പിന്നാലെ അവിടെയുള്ളവര്‍ തന്നോട് തന്തൂരി ഓവന്‍ കത്തിച്ചുവെക്കാന്‍ ആവശ്യപ്പെട്ടുവെന്നാണ് കോണ്‍സുലേറ്റിലെ ജീവനക്കാരന്‍ കോടതിയില്‍ പറഞ്ഞത്. കോണ്‍സുലേറ്റില്‍ ജോലി ചെയ്തിരുന്ന സെകി ഡെമിര്‍ എന്ന ടെക്‌നീഷ്യനാണ് തെളിവുകള്‍ നല്‍കിയത്.
ഖഷോഗി കോണ്‍സുലേറ്റില്‍ എത്തിയതിനു പിന്നാലെ തന്നെ കോണ്‍സല്‍ വസതിയിലേക്ക് വിളിപ്പിച്ചതായി ഇദ്ദേഹം പറഞ്ഞു. 'അവിടെ അഞ്ചോ ആറോ പേരുണ്ടായിരുന്നു. അവര്‍ എന്നോട് ഓവന്‍ കത്തിക്കാന്‍ ആവശ്യപ്പെട്ടു. പരിഭ്രാന്തിയുടെ അന്തരീക്ഷമായിരുന്നു അവിടെ. എത്രയും പെട്ടെന്ന് ഞാന്‍ അവിടെ നിന്നു വിടണമെന്ന് അവര്‍ ആഗ്രഹിക്കുന്ന പോലെ തോന്നി'- സെകി ഡെമിര്‍ പറഞ്ഞു. കോണ്‍സുലേറ്റ് ജീവനക്കാരന്റെ സാക്ഷ്യമനുസരിച്ച് കോണ്‍സുലേറ്റിലെ പൂന്തോട്ടത്തില്‍ ഓവന്‍ കണ്ടെത്തിയിട്ടുണ്ട്. കൊലപ്പെടുത്തിയ ശേഷം മൃതദേഹം കത്തിച്ചുകളയാനാണ് ഓവന്‍ കത്തിച്ചതെന്നാണ് കുറ്റപത്രത്തില്‍ പറയുന്നത്. അടുപ്പിന് ചുറ്റുമുള്ള മാര്‍ബിള്‍ സ്ലാബുകള്‍ രാസവസ്തു ഉപയോഗിച്ച് വൃത്തിയാക്കിയതായി രണ്ടു ദിവസത്തിനു ശേഷം അവിടെ ചെന്നപ്പോള്‍ കണ്ടെന്നും ഡെമിര്‍ സാക്ഷിമൊഴിയില്‍ പറഞ്ഞു.
വെള്ളിയാഴ്ചയാണ് തുര്‍ക്കി കോടതിയില്‍ ഖഷോഗി വധക്കേസിലെ 20 പേരുടെ വിചാരണ തുടങ്ങിയത്.