ബെല്‍ജിയം ടീം റഷ്യയിലേക്ക് വണ്ടി കയറിയത് ഒരുപാട് പ്രതീക്ഷകളുമായിട്ടായിരുന്നു. ചില ടീമുകളെങ്കിലും റഷ്യ കണ്ട് തിരിച്ചുപോകാമെന്നും മറ്റു ചിലര്‍ ഒന്നാം റൗണ്ട് കടക്കാമെന്ന മോഹത്തിലുമെത്തിയപ്പോള്‍ ബെല്‍ജിയം റഷ്യയിലെത്തിയത് വ്യക്തമായ പ്ലാനും പദ്ധതിയും തയാറാക്കിയിട്ടായിരുന്നു. ബെല്‍ജിയം പരിശീലകന്‍ റോബര്‍ട്ടോ മാര്‍ട്ടിനസ് മുന്നേറ്റ നിരയില്‍ തന്റെ പ്ലാന്‍ നടപ്പാക്കാന്‍ കണ്ടുവച്ച ഒരായുധമായിരുന്നു റൊമേലു ലുക്കാക്കു എന്ന കൊമ്പന്‍. നാലു ഗോളുകളുമായി ഗോള്‍വേട്ടയില്‍ താരം രണ്ടാം സ്ഥാനത്ത് നില്‍ക്കുന്നു. ആദ്യ മത്സരം മുതല്‍ തന്നെ ലുക്കാക്കുവിനെ പിടിച്ചു കെട്ടാന്‍ എല്ലാ ടീമുകളും നന്നേ വിയര്‍ത്തു. രണ്ട് ഗോള്‍ നേടി മൂന്നാം ഗോള്‍ നേടാന്‍ സുന്ദരമായ അവസരമുണ്ടായിരുന്ന സമയത്തും ബെല്‍ജിയം കോച്ച് മാര്‍ട്ടിനസ് ലുക്കാക്കുവിനെ പിന്‍വലിച്ച് മറ്റൊരാളെ ഇറക്കിയത് തന്റെ വ്യക്തമായ പ്ലാന്‍ വെളിവാക്കുന്നതാണ്. ഇതില്‍ കൂടുതല്‍ ഗോള്‍ നേടിയില്ലെങ്കില്‍ അടുത്ത മത്സരത്തില്‍ ലുക്കാക്കുവിന് ഗോള്‍ നേടാനാകുമെന്ന മാര്‍ട്ടിനെസിന്റെ ദീര്‍ഘ വീക്ഷണം തന്നെയാണ് ലൂക്കാക്കുവിന്റെ കരുത്ത്. ബെല്‍ജിയത്തിന്റെ ജയത്തിലെല്ലാം ലുക്കാക്കുവിന്റെ ടച്ചുണ്ട്. ആദ്യ മത്സരത്തില്‍ രണ്ട് ഗോള്‍. അടുത്ത രണ്ട് മത്സരങ്ങളിലും തുടരെ ഓരോ ഗോള്‍ വീതം നേടി ഗോള്‍ നേട്ടം നാലിലെത്തിച്ചു. ബ്രസീലിനെതിരേയുള്ള മത്സരത്തില്‍ എത്ര കെട്ടിയിട്ടിട്ടും അടങ്ങാത്ത ലുക്കാക്കുവിന്റെ ഗോള്‍ ദാഹം ഇനിയും തീരില്ല. റഷ്യന്‍ കാര്‍ണിവെല്‍ അവസാനിക്കുമ്പോള്‍ ഉയര്‍ന്നു കേള്‍ക്കുന്ന പേരുകളിലൊന്നില്‍ ലുക്കാക്കുവിന്റെ പേരുമുണ്ടാകുമെന്ന കാര്യത്തില്‍ തര്‍ക്കമൊന്നുമില്ല.