കൂത്തുപറമ്പ്: കണ്ണവം തൊടീക്കളത്ത് യുവാവ് വെട്ടേറ്റു മരിച്ചു. യു.ടി.സി കോളനിക്കു സമീപത്തെ റബര്‍ തോട്ടത്തിലാണ് തൊടീക്കളം അമ്പലത്തിനു സമീപം പുതുശേരി നിവാസില്‍ പി. രാഗേഷ് (38) വെട്ടേറ്റു മരിച്ചത്. നാട്ടുകാരാണ് ഇന്നലെ രാവിലെ 6.45ഓടെ റബര്‍ തോട്ടത്തില്‍ രാഗേഷ് വെട്ടേറ്റു കിടക്കുന്ന വിവരം കണ്ണവം പൊലിസില്‍ അറിയിച്ചത്. ഉടന്‍ പൊലിസ് രാഗേഷിനെ തലശേരി ജനറല്‍ ആശുപത്രിയില്‍ എത്തിച്ചെങ്കിലും മരണപ്പെട്ടിരുന്നു.

കോളനിയിലെ ഒരു ആടിനെ കാണാതായതുമായി ബന്ധപ്പെട്ട് കോളനിവാസികളില്‍ ചിലര്‍ ശനിയാഴ്ച രാത്രി വൈകി രാഗേഷിന്റെ വീട്ടില്‍ വന്നിരുന്നതായി നാട്ടുകാര്‍ പറഞ്ഞു. കണ്ണവം പൊലിസ് കേസെടുത്ത് അന്വേഷണം തുടങ്ങി. തൊടീക്കളം ഹെല്‍ത്ത് സെന്റര്‍ സി.പി.എം മുന്‍ ബ്രാഞ്ച് അംഗമാണ് രാഗേഷ്. സംഭവത്തില്‍ രാഷ്ട്രീയമില്ലെന്ന് പൊലിസ് പറഞ്ഞു. തൊടീക്കളത്തെ പരേതനായ പുതുശേരി രാഘവന്റെയും പദ്മിനിയുടെയും മകനാണ്. ഭാര്യ: ഷിജിന. മക്കള്‍: ചന്ദന, അഞ്ജന. സഹോദരങ്ങള്‍: പുതുശേരി രജീഷ്, രേഷ്മ.