ന്യൂഡല്‍ഹി: അഗസ്റ്റ വെസ്റ്റ്‌ലന്‍ഡ് ഇടപാടുമായി ബന്ധപ്പെട്ട അഴിമതി കേസില്‍ എ.പി എന്ന പേരില്‍ അറിയപ്പെട്ടത് മുതിര്‍ന്ന കോണ്‍ഗ്രസ് നേതാവ് അഹമ്മദ് പട്ടേല്‍ ആണെന്ന് എന്‍ഫോഴ്‌സ്‌മെന്റ് ഡയരക്ടറേറ്റ് സമര്‍പ്പിച്ച കുറ്റപത്രത്തില്‍ പരാമര്‍ശം.
ഇടനിലക്കാരനായ ക്രിസ്റ്റ്യന്‍ മിഷേലിനെതിരായി ഡല്‍ഹിയിലെ വിചാരണക്കോടതി മുന്‍പാകെ സമര്‍പ്പിച്ച കുറ്റപത്രത്തിലാണ് ഇത്തരമൊരു പരാമര്‍ശമുള്ളത്.

അഹമ്മദ് പട്ടേലിന് പുറമെ സോണിയാ ഗാന്ധിയുടെ പേരും പരാമര്‍ശിച്ചിട്ടുണ്ട്.
അതേസമയം എന്‍ഫോഴ്‌സ്‌മെന്റ് ഡയരക്ടറേറ്റ് സമര്‍പ്പിച്ച കുറ്റപത്രത്തില്‍ തന്റെ പേര് പരാമര്‍ശിക്കപ്പെട്ടതില്‍ ഒരു അടിസ്ഥാനവുമില്ലെന്ന് അഹമ്മദ് പട്ടേല്‍ വ്യക്തമാക്കി. പരിഹാസ്യവും തെരഞ്ഞെടുപ്പ് ലക്ഷ്യം വച്ചുള്ള ആരോപണവുമാണ് ഇതിന് പിന്നിലുള്ളത്. ജുഡീഷ്യറിയില്‍ തനിക്ക് പൂര്‍ണ വിശ്വാസമുണ്ടെന്ന് അഹമ്മദ് പട്ടേല്‍ വ്യക്തമാക്കി.

അതിനിടയില്‍ തനിക്കെതിരായി സമര്‍പ്പിച്ച കുറ്റപത്രം മാധ്യമങ്ങള്‍ വഴി ചോര്‍ന്നതായി ക്രിസ്റ്റ്യന്‍ മിഷേല്‍ ആരോപിച്ചു. ഇതുമായി ബന്ധപ്പെട്ട് അദ്ദേഹം നല്‍കിയ ഹരജിയുടെ അടിസ്ഥാനത്തില്‍ ഡല്‍ഹി പട്യാല കോടതി എന്‍ഫോഴ്‌സ്‌മെന്റ് ഡയരക്ടറേറ്റിന് നോട്ടിസ് അയച്ചു. എങ്ങനെയാണ് കുറ്റപത്രം ചോര്‍ന്നതെന്ന് ഇന്ന് കോടതിയില്‍ വ്യക്തമാക്കണമെന്ന് നോട്ടിസില്‍ പറയുന്നു. രാഷ്ട്രപതി, പ്രധാനമന്ത്രി, മുന്‍പ്രധാനമന്ത്രിമാര്‍ തുടങ്ങി രാജ്യത്തെ പ്രമുഖര്‍ക്കുവേണ്ടി 3,600 കോടി രൂപയ്ക്കായി 12 ആഡംബര ഹെലികോപ്റ്ററുകള്‍ വാങ്ങുന്നതുമായി ബന്ധപ്പെട്ടാണ് അഴിമതി നടന്നതായി പറയപ്പെടുന്നത്.