തിരുവനന്തപുരം: മുട്ടറ സ്‌കൂളിലെ പ്ലസ്ടു വിദ്യാര്‍ഥികളുടെ ഉത്തരക്കടലാസുകള്‍ കാണാതായ സംഭവത്തില്‍ തപാല്‍വകുപ്പിനെ കുറ്റപ്പെടുത്തി വിദ്യാഭ്യാസ വകുപ്പ്. മുട്ടറ ഹയര്‍സെക്കന്‍ഡറിയിലെ 61 വിദ്യാര്‍ഥികളുടെ കണക്ക് പരീക്ഷയുടെ ഉത്തരക്കടലാസുകളാണ് മേല്‍വിലാസം തെറ്റി അയച്ചതിനെ തുടര്‍ന്ന് കാണാതായത്. ഉത്തരക്കടലാസുകള്‍ ഇതുവരെ കണ്ടുകിട്ടിയിട്ടില്ലെന്നും പ്രശ്‌നം പോസ്റ്റല്‍ വകുപ്പിന്റെതാണെന്നും പൊതുവിദ്യാഭ്യാസ ഡയരക്ടര്‍ പ്രതികരിച്ചു. പരീക്ഷാഫലം പ്രഖ്യാപിക്കുന്നതിന് മുന്‍പ് ഇക്കാര്യത്തില്‍ തീരുമാനമുണ്ടാകും. ഇതിനായി ഹയര്‍സെക്കന്‍ഡറി പരീക്ഷാ ബോര്‍ഡ് ഉടന്‍ ചേരും. ബോര്‍ഡ് ചേരുന്നത് എന്നാണെന്ന് നിശ്ചയിച്ചിട്ടില്ലെന്നും പൊതുവിദ്യാഭ്യാസ ഡയരക്ടര്‍ കെ. ജീവന്‍ബാബു പറഞ്ഞു. 

തപാല്‍വകുപ്പിന്റെ പക്കല്‍ നിന്നാണ് ഉത്തരക്കടലാസുകള്‍ നഷ്ടപ്പെട്ടതെന്നാണ് സ്‌കൂള്‍ അധികൃതരുടെയും വാദം. എന്നാല്‍, സ്‌കൂളിന്റെ ഭാഗത്ത് വീഴ്ചയുണ്ടായതായി തപാല്‍ വകുപ്പും ആരോപിക്കുന്നു. 

ഉത്തരക്കടലാസുകള്‍ ഉടന്‍ കണ്ടുകിട്ടിയില്ലെങ്കില്‍ ആനുപാതിക മാര്‍ക്ക് നല്‍കലോ പുനഃപരീക്ഷയോ വേണ്ടി വരും. ബോര്‍ഡിന്റെ തീരുമാനത്തിന് അനുസരിച്ചായിരിക്കും തുടര്‍നടപടികള്‍. ഉടന്‍ ബോര്‍ഡ് ചേര്‍ന്ന് ഉചിത തീരുമാനമെടുത്തില്ലെങ്കില്‍ ഈ വിദ്യാര്‍ഥികളുടെ ഭാവി അനിശ്ചിതത്വത്തിലാകും.