നെടുമ്പാശ്ശേരി: അന്താരാഷ്ട്ര വിമാനത്താവളം വഴി സ്വര്‍ണം കടത്താന്‍ ശ്രമിച്ച മലപ്പുറം സ്വദേശിയായ യുവതി കസ്റ്റംസ് എയര്‍ ഇന്റലിജന്‍സ് വിഭാഗത്തിന്റെ പിടിയിലായി. ഇന്നലെ പുലര്‍ച്ചെ ദോഹയില്‍നിന്ന് എയര്‍ ഇന്ത്യ എക്‌സ്പ്രസ് വിമാനത്തില്‍ എത്തിയ മലപ്പുറം ചെമ്മാട് സ്വദേശി ആഷിഫയാണ് പിടിയിലായത്.
2453 ഗ്രാം കുഴമ്പ് രൂപത്തിലുള്ള സ്വര്‍ണവും 116 ഗ്രാം തൂക്കമുള്ള സ്വര്‍ണമാലയുമാണ് യുവതിയില്‍നിന്ന് പിടിച്ചെടുത്തത്. യുവതിക്കൊപ്പമുണ്ടായിരുന്ന കുട്ടിയുടെ ഡയപ്പറിനകത്താണ് സ്വര്‍ണമാല ഒളിപ്പിച്ചിരുന്നത്.

കുഴമ്പ് രൂപത്തിലുള്ള സ്വര്‍ണം യുവതിയുടെ അടിവസ്ത്രത്തില്‍ ഒളിപ്പിച്ചിരിക്കുകയായിരുന്നു. പിടികൂടിയ സ്വര്‍ണത്തിന് ഏകദേശം 75 ലക്ഷം രൂപയിലധികം വില വരും. കുഴമ്പ് രൂപത്തിലുള്ള സ്വര്‍ണ മിശ്രിതത്തില്‍നിന്ന് രണ്ടേകാല്‍ കിലോഗ്രാം സ്വര്‍ണം വേര്‍തിരിച്ചെടുക്കാനാകും. യുവതിയെ ചോദ്യം ചെയ്‌തെങ്കിലും ആര്‍ക്കു വേണ്ടിയാണ് സ്വര്‍ണം കൊണ്ടുവന്നതെന്ന് വെളിപ്പെടുത്തിയിട്ടില്ലെന്നാണ് വിവരം.