ചാരുംമൂട്: കറ്റാനം കണ്ണനാകുഴിയില്‍ കള്ള് ഷാപ്പില്‍ നിന്ന് സ്പിരിറ്റും വ്യാജക്കള്ളും എക്‌സൈസ് സംഘം പിടികൂടി. ഷാപ്പ് നടത്തിപ്പുകാരനെ അറസ്റ്റു ചെയ്തു. സ്പിരിറ്റ് കടത്തിയ സ്വിഫ്റ്റ് കാറും കസ്റ്റഡിയിലെടുത്തു. മാവേലിക്കര റേഞ്ചിലെ കറ്റാനത്തിന് സമീപം കണ്ണനാകുഴിയിലെ 14 ാം നമ്പര്‍ കള്ള്ഷാപ്പില്‍ നിന്നാണ് 250 ലിറ്റര്‍ വ്യാജക്കള്ളും, 35 ലിറ്റര്‍ സ്പിരിറ്റും പിടിച്ചെടുത്തത്. ഷാപ്പ് നടത്തിപ്പുകാരനായ വള്ളികുന്നം തോണുവേലില്‍ പടീറ്റതില്‍ പുഷ്പാംഗദനെ (55)യാണ് അറസ്റ്റ് ചെയ്തത്. രഹസ്യവിവരത്തെ തുടര്‍ന്ന് ഷാപ്പ് എക്‌സൈസിന്റെ നിരീക്ഷണത്തിലായിരുന്നു. ഞായറാഴ്ച പുലര്‍ച്ചെ ആലപ്പുഴയില്‍ നിന്നുള്ള എക്‌സൈസ് സ്‌പെഷല്‍ സ്‌ക്വാഡ് സി.ഐ കെ.ആര്‍. ബാബുവിന്റെ നേതൃത്വത്തിലായിരുന്നു റെയ്ഡ്. കള്ളില്‍ ചേര്‍ത്ത് വില്‍പ്പന നടത്തുന്നതിനായാണ് സ്പിരിറ്റ് സൂക്ഷിച്ചിരുന്നത്.
രണ്ടു കിലോമീറ്ററോളം അകലെയുള്ള പുഷ്പാംഗദന്റെ വീട്ടിലും സംഘം റെയ്ഡ് നടത്തി. സമീപമുള്ള പാടത്ത് 250 ലിറ്ററോളം സിപിരിറ്റ് ഒഴുക്കി കളഞ്ഞതായും എക്‌സൈസ് സംഘം കണ്ടെത്തിയിട്ടുണ്ട്. സ്പിരിറ്റിന്റെ ഉറവിടം കണ്ടെത്താനുള്ള അന്വേഷണം നടത്തുമെന്നും സി.ഐ പറഞ്ഞു. ഷാപ്പ് അടച്ചിടാനും എക്‌സൈസ് നിര്‍ദേശം നല്‍കി. എക്‌സൈസ് ഇന്‍സ്‌പെക്ടര്‍ അജിത്കുമാര്‍, പ്രിവന്റീവ് ഓഫിസര്‍മാരായ എന്‍.കിഷോര്‍, എന്‍.ബാബു, സിവില്‍ എക്‌സൈസ് ഓഫിസര്‍മാരായ അനിലാല്‍ , എം.റെനി, ജിയേഷ്, അരുണ്‍ എന്നിവരും സംഘത്തിലുണ്ടായിരുന്നു.