പാലാ: നവ ഉദാരവല്‍കരണ സാമ്പത്തിക പ്രവര്‍ത്തനങ്ങളുള്ള സര്‍ക്കാരിനെ താഴെയിറക്കി ബദല്‍ നയങ്ങളുള്ള സര്‍ക്കാര്‍ അധികാരത്തില്‍ വരണമെന്ന് മുഖ്യമന്ത്രി പിണറായി വിജയന്‍.
ഇടതു മുന്നണി സ്ഥാനാര്‍ഥി വി.എന്‍ വാസവന്റെ തെരഞ്ഞെടുപ്പ് പ്രചാരണത്തിന്റെ ഭാഗമായി പാലായില്‍ നടന്ന സമ്മേളനത്തില്‍ പ്രസംഗിക്കുകയായിരുന്നു അദ്ദേഹം. 2009 മുതല്‍ 2019 വരെ ജനങ്ങളെ സംബന്ധിച്ചിടത്തോളം ദുരിതത്തിന്റെ കാലമായിരുന്നു. രണ്ടു സര്‍ക്കാരുകള്‍ അധികാരത്തില്‍ വന്നെങ്കിലും നവ ഉദാര സാമ്പത്തിക നയങ്ങള്‍ പിന്തുടര്‍ന്നു കോര്‍പറേറ്റുകളെ പ്രീണിപ്പിക്കുകയായിരുന്നു.
കേരളത്തില്‍ ഇടതു സര്‍ക്കാര്‍ അധികാരത്തില്‍ വന്നപ്പോള്‍ വിവിധ പദ്ധതികള്‍ നടപ്പിലാക്കി . പൊതുവിദ്യാഭ്യാസ രംഗത്ത് ഉണര്‍വുണ്ടായി. ഇതെല്ലാം ബദല്‍ നയങ്ങളുടെ മാതൃകയാണ്. ഇതിനിടയില്‍ സംസ്ഥാനത്തിന്റെ വികസനത്തിന് തിരിച്ചടിയായി വന്ന പ്രളയ ദുരന്തത്തെ നമ്മള്‍ ഒറ്റക്കെട്ടായി നേരിട്ടു. ലോകത്തിന്റെ പല ഭാഗത്തു നിന്ന് ആളുകള്‍ സഹായവുമായി എത്തിയപ്പോള്‍ സഹായം സ്വീകരിക്കുന്നതിന് അനുമതി നല്‍കാതെ ചിലര്‍ സംസ്ഥാനത്തിനിട്ട് പാരവച്ചു. പക്ഷേ കേരള ജനത അതെല്ലാം അതിജീവിച്ചു. പ്രളയത്തെ നമ്മള്‍ ഒറ്റക്കെട്ടായി നേരിട്ടപ്പോള്‍ അസംതൃപ്തരായ ചിലര്‍ ദുരന്തം മനുഷ്യനിര്‍മിതമാണെന്ന് ആരോപിച്ചു. കേന്ദ്ര ജലവിഭവ വകുപ്പിന്റെ വിദഗ്ധ സംഘവും ഐ.ഐ.ടി സംഘവും പ്രളയം പ്രകൃതിദുരന്തമാണെന്ന് വിലയിരുത്തിയിട്ടുണ്ട്. പ്രളയത്തെ നേരിട്ട രീതിയെ പലരും പ്രശംസിക്കുകയും ചെയ്തു. ഇതെല്ലാം സര്‍ക്കാരിനുള്ളതല്ല ജനങ്ങള്‍ക്കുള്ള പ്രശംസയാണ്. കോട്ടയത്ത് ഇടതുമുന്നണി കരുത്തനായ സ്ഥാനാര്‍ഥിയെയാണ് മത്സരരംഗത്തിറക്കിയതെന്നും പിണറായി വിജയന്‍ പറഞ്ഞു.