കൊച്ചി: കൊവിഡിന്റെ പശ്ചാത്തലത്തില്‍ സംസ്ഥാനത്ത് ഡ്രൈവിങ് ലേണേഴ്‌സ് ലൈസന്‍സിനായുള്ള ഓണ്‍ലൈന്‍ പരീക്ഷ ഇന്ന് ആരംഭിക്കും. സ്മാര്‍ട്ട് ഫോണിലോ കംപ്യൂട്ടറിലോ ടാബിലോ ഏത് സമയത്തും പരീക്ഷ എഴുതാമെന്നതാണ് മേന്‍മയായി ചൂണ്ടിക്കാണിക്കപ്പെടുന്നത്. 

 

എന്നാല്‍ വീട്ടില്‍വച്ചോ ഡ്രൈവിങ് സ്‌കൂളിലോ വച്ച് മറ്റൊരാളുടെ സഹായത്തോടെയോ കോപ്പിയടിച്ചോ പരീക്ഷ എഴുതുന്ന വ്യക്തിക്ക് ക്രമക്കേട് നടത്താനാവുമെന്ന് ആരോപണമുയര്‍ന്നിട്ടുണ്ട്. അപേക്ഷകനല്ലാതെ മറ്റൊരാള്‍ക്ക് പരീക്ഷയില്‍ പങ്കെടുക്കാമെന്നിരിക്കേ ഇത് കണ്ടെത്താന്‍ കഴിയുകയില്ലെന്ന ന്യൂനതയാണ് ചൂണ്ടിക്കാണിക്കപ്പെടുന്നത്. ഇതിന് തടയിടാന്‍ ക്രമക്കേട് നടത്തിയെന്നറിഞ്ഞാല്‍ അപേക്ഷകനെ അയോഗ്യനാക്കുമെന്ന് മോട്ടോര്‍ വാഹനവകുപ്പ് മുന്നറിയിപ്പ് നല്‍കുന്നുണ്ട്. 

 

അതേസമയം, ലേണേഴ്‌സ് ടെസ്റ്റില്‍ സാധാരണഗതിയില്‍ ഒരു ശതമാനം പേര്‍ മാത്രമേ തോല്‍ക്കാറുള്ളൂവെന്നും അതിനാല്‍ തല്‍ക്കാലം പരീക്ഷയില്‍ പങ്കെടുക്കുന്നവരെ കര്‍ശനമായി നിരീക്ഷിക്കേണ്ടതില്ലെന്നുമാണ് വകുപ്പ് രഹസ്യമായി വിശദീകരിക്കുന്നത്. 

ഇതു മുതലെടുത്ത് പല ഡ്രൈവിങ് സ്‌കൂള്‍ അധികൃതരും ലേണേഴ്‌സിന് അപേക്ഷിക്കുന്നവരെ 'നേരിട്ട് സഹായിക്കാന്‍' നടപടി സ്വീകരിച്ചുണ്ടെന്ന് സൂചനയുണ്ട്.

 

അപേക്ഷിക്കുമ്പോള്‍ മെഡിക്കല്‍, കാഴ്ച പരിശോധന സര്‍ട്ടിഫിക്കറ്റുകളും വയസ്, മേല്‍വിലാസം എന്നിവ തെളിയിക്കാനുള്ള സര്‍ട്ടിഫിക്കറ്റുകളുടെയും സ്വയം സാക്ഷ്യപ്പെടുത്തിയ രേഖകളും സ്‌കാന്‍ ചെയ്ത് സമര്‍പ്പിക്കേണ്ടതുണ്ട്. അവരവര്‍ തെരഞ്ഞെടുക്കുന്ന തിയതിയില്‍ പരീക്ഷയെഴുതാം.

 

ഓണ്‍ലൈനില്‍ നല്‍കുന്ന അപേക്ഷകളില്‍ പിഴവില്ലാത്തവ അംഗീകരിക്കുകയും പിഴവുണ്ടെങ്കില്‍ അപേക്ഷകനെ മെസേജിലൂടെ അറിയിക്കുകയും ചെയ്യും. 

 

അപ്ലൈ ഓണ്‍ലൈനിലെ മെനുവില്‍ ആപ്ലിക്കേഷന്‍ സ്റ്റാറ്റസ് പിഴവുകള്‍ പരിഹരിച്ച് വീണ്ടും അപേക്ഷ സമര്‍പ്പിക്കാം. 50 ചോദ്യങ്ങളാണ് ഉണ്ടാവുക. അരമണിക്കൂറിനുള്ളില്‍ 30 ശരി ഉത്തരങ്ങള്‍ രേഖപ്പെടുത്തിയാല്‍ ലേണേഴ്‌സ് കടന്നുകിട്ടും.