തിരുവനന്തപുരം: കൊവിഡിന്റെ പശ്ചാത്തലത്തില്‍ സംസ്ഥാനത്ത് ഓണ്‍ലൈന്‍ ക്ലാസുകള്‍ തുടങ്ങിയിട്ട് 36 ദിവസമായിട്ടും പാഠപുസ്തകങ്ങള്‍ ലഭിക്കാതെ വിദ്യാര്‍ഥികള്‍. പാഠപുസ്തകങ്ങള്‍ തയാറാക്കിയെന്ന് വിദ്യാഭ്യാസ വകുപ്പ് അവകാശപ്പെടുന്നുണ്ടെങ്കിലും കുട്ടികളുടെ കൈയിലെത്തിക്കാന്‍ ഇതുവരെ കഴിഞ്ഞിട്ടില്ല. 

ലോക്ക്ഡൗണ്‍ ഇളവുകള്‍ വന്നിട്ട് ഒരുമാസം കഴിഞ്ഞിട്ടും പുസ്തകങ്ങള്‍ പൂര്‍ണമായും ലഭിച്ചില്ലെന്നാണ് മിക്ക സ്‌കൂളുകളുടെയും പരാതി. 

ഹൈസ്‌കൂളുകളില്‍ ഭാഷാ വിഷയങ്ങള്‍ ഒഴികെയുള്ള പുസ്തകങ്ങളൊന്നും ലഭിച്ചിട്ടില്ല. ഓണ്‍ലൈന്‍ ക്ലാസുകള്‍ മുറയ്ക്ക് നടക്കുന്നുണ്ടെങ്കിലും പുസ്തകം ലഭിക്കാത്തതിനാല്‍ പഠനം നടക്കുന്നില്ലെന്നാണ് രക്ഷിതാക്കളുടെ പരാതി. 

പുസ്തകങ്ങള്‍ എന്ന് ലഭിക്കുമെന്ന കാര്യത്തിലും വ്യക്തതയില്ല. 

അഞ്ചാം ക്ലാസിലെ അറബിക്, ആറിലെ സയന്‍സ്, കണക്ക്, ഐ.ടി, ഏഴിലെ മലയാളം പാര്‍ട്ട് ഒന്ന്, പാര്‍ട്ട് രണ്ട്, സയന്‍സ്, സോഷ്യല്‍, ഐ.ടി, എട്ടിലെ മലയാളം പാര്‍ട്ട് ഒന്ന്,  പാര്‍ട്ട് രണ്ട്, ഒന്‍പതിലെ ഫിസിക്‌സ്, ഇംഗ്ലീഷ്, മാത്‌സ്, ഐ.ടി, പത്തിലെ അറബിക് തുടങ്ങിയ പുസ്തകങ്ങളാണ് കുട്ടികള്‍ക്ക് ലഭിക്കാനുള്ളത്. 

ഹയര്‍സെക്കന്‍ഡറി വിദ്യാര്‍ഥികളുടെ സ്ഥിതിയും വ്യത്യസ്തമല്ല. ഫിസിക്‌സ്, കെമിസ്ട്രി, മാത്‌സ്, ബയോളജി, കംപ്യൂട്ടര്‍ സയന്‍സ്, അക്കൗണ്ടന്‍സി എന്നിങ്ങനെ മിക്ക വിഷയങ്ങളുടെ പുസ്തകങ്ങളും കിട്ടാനുണ്ട്. അതേസമയം, ഭൂരിഭാഗം സ്‌കൂളുകളിലും ഭാഷാവിഷയങ്ങളുടെ പുസ്തകങ്ങള്‍ എത്തിയിട്ടുണ്ട്. കൊവിഡിന്റെ പേരില്‍ മനഃപൂര്‍വം പുസ്തകങ്ങള്‍ വൈകിപ്പിക്കുന്നതായും പരാതിയുണ്ട്. പാഠപുസ്തകങ്ങളുടെ അച്ചടി പൂര്‍ത്തിയാകാത്തതിനാലാണ് പുസ്തകങ്ങള്‍ വിതരണം ചെയ്യാത്തതെന്നും ആക്ഷേപമുണ്ട്.