പത്തനംതിട്ട: ക്വാറന്റൈന്‍ ലംഘിച്ച് പത്തനംതിട്ട നഗരത്തില്‍ ഇറങ്ങിയ ആളെ പൊലിസും ആരോഗ്യപ്രവര്‍ത്തകരും ഓടിച്ചിട്ട് പിടികൂടി. പത്തനംതിട്ട സെന്റ് പീറ്റേഴ്‌സ് ജംഗ്ഷനില്‍ തിങ്കളാഴ്ച്ച ഉച്ചയോടെയാണ് സംഭവം.

മൂന്ന് ദിവസം മുന്‍പ് ദുബൈയില്‍ നിന്നും എത്തിയ ആളാണ് ക്വാറന്റൈന്‍ ലംഘിച്ച് പുറത്തിറങ്ങിയത്. മാസ്‌ക് കൃത്യമായി ധരിക്കാതെയാണ് ഇയാള്‍ നഗരത്തില്‍ കറങ്ങിനടന്നത്. ഇത് ശ്രദ്ധയില്‍പെട്ടതിനെത്തുടര്‍ന്ന് പൊലിസ് ഇയാളെ ചോദ്യം ചെയ്യുകയായിരുന്നു. അപ്പോഴാണ് ഇയാള്‍ ഗള്‍ഫില്‍ നിന്നും എത്തിയതാണെന്ന കാര്യം അറിയുന്നത്.

ഇതോടെ പി.പി.ഇ കിറ്റ് അണിഞ്ഞ ആരോഗ്യപ്രവര്‍ത്തര്‍ എത്തി ഇയാളെ കൊണ്ടുപോകാന്‍ ശ്രമിച്ചു. എന്നാല്‍ വഴങ്ങാതെ ഇയാള്‍ കുതറി ഓടുകയായിരുന്നു. പിന്നീട് കൂടുതല്‍ പൊലിസ് എത്തിയാണ് ഇയാളെ പിടികൂടിയത്. കൈകാലുകള്‍ ബന്ധിച്ചാണ് ഇയാളെ ആശുപത്രിയിലേക്ക് കൊണ്ടുപോയത്.

കോഴഞ്ചേരി ആശുപത്രിയില്‍ പ്രവേശിപ്പിച്ച ഇയാളുടെ സഞ്ചാരപാത വ്യക്തമല്ല. ഇയാള്‍ ഭാര്യയുമായി വഴക്കിട്ടാണ് നഗരത്തിലെത്തിയതെന്നാണ് പൊലിസ് അന്വേഷണത്തില്‍ മനസിലായത്.