ഫറൂക്കാബാദ്: രണ്ട് ദിവസം മുന്‍പ് 60 അടി താഴ്ചയിലുള്ള കുഴല്‍ കിണറില്‍ വീണ ഏഴു വയസുകാരിയെ രക്ഷിക്കാനുള്ള ശ്രമം തുടരുന്നു. ബുധനാഴ്ച വൈകീട്ടാണ് ഫറൂക്കാബാദ് ജില്ലയിലെ കമാല്‍ഗഞ്ചിനടുത്ത റാസിദാപൂര്‍ ഗ്രാമത്തില്‍ വീട്ടിനടുത്ത് കളിച്ചുകൊണ്ടിരിക്കെ സീമ എന്ന പെണ്‍കുട്ടി കുഴല്‍ കിണറില്‍ വീണത്. ദേശീയ ദുരന്തനിവാരണ സേന, സൈന്യം എന്നിവര്‍ രക്ഷാപ്രവര്‍ത്തനത്തിനായി രംഗത്തെത്തിയിട്ടുണ്ടെന്ന് ജില്ലാ കലക്ടര്‍ മോണികാ റാണി അറിയിച്ചു. കുഴല്‍ കിണറിന്റെ അടിത്തട്ടില്‍ മണ്ണ് കുതിര്‍ന്ന നിലയിലായതു കാരണം പെണ്‍കുട്ടിയുടെ നിലയെ സംബന്ധിച്ച് വ്യക്തമായ വിവരം ഇതുവരെ ലഭിച്ചിട്ടില്ല. കുഴല്‍ കിണറിന് സമാനമായി കുഴിയെടുക്കുന്നുണ്ടെങ്കിലും വേണ്ടത്ര വിജയപ്രദമാകുന്നില്ലെന്നാണ് രക്ഷാപ്രവര്‍ത്തകര്‍ പറയുന്നത്.