കൊച്ചി: സമുദ്രപരപ്പിലൂടെ ലോകം ചുറ്റുന്ന വിനോദസഞ്ചാരികളുമായി ഇന്നലെ കൊച്ചി തുറമുഖത്ത് നങ്കൂരമിട്ടത് മൂന്ന് ആഡംബര കപ്പലുകള്‍. കടുത്ത ചൂടിനെ വകവെയ്ക്കാതെ സഞ്ചാരികള്‍ കൊച്ചിയും ആലപ്പുഴയും കാണാന്‍ ഇറങ്ങിയതോടെ കൊച്ചിക്ക് ഉത്സവലഹരിയായി. സഞ്ചാരികളും കപ്പല്‍ ജീവനക്കാരുമായ പതിനായിരത്തോളം പേര്‍ കരയിലേക്ക് ഇറങ്ങിയതോടെ മന്ദഗതിയിലായ വിനോദസഞ്ചാരമേഖലയ്ക്ക് പുത്തനുണര്‍വായി മാറി.

യൂറോപ്യന്‍ യാത്രാകപ്പലായ മറില്ല ഡിസ്‌കവറിയും ഇറ്റാലിയന്‍ കപ്പലുകളായ കോസ്റ്റ ലുമിനോസ, കോസ്റ്റ വെനേസിയയുമാണ് ഇന്നലെ കൊച്ചി തുറമുഖത്ത് ഓരേ സമയം നങ്കൂരമിട്ടത്. കോസ്റ്റ ക്രൂയിസിന്റെ രണ്ടു കപ്പലുകള്‍ ഒരേസമയം കൊച്ചി തുറമുഖത്ത് അടുത്തതോടെ ഒരു കമ്പനിയുടെ രണ്ടു കപ്പലുകള്‍ ലോകം ചുറ്റി ഒരേസമയം തുറമുഖത്ത് അടുക്കുന്ന ചരിത്രമുഹൂര്‍ത്തത്തിനും കൊച്ചി സാക്ഷിയായി. 109 ദിവസത്തെ ലോക പര്യടനത്തിലാണ് കോസ്റ്റ ലുമിനോസ.

ചൈനീസ് വിപണിക്കു വേണ്ടി രൂപകല്‍പ്പന ചെയ്ത ആദ്യ കോസ്റ്റ കപ്പലായ വെനേസിയ ചൈനയിലേക്കുള്ള യാത്രയ്ക്കിടയിലാണ് അറബിക്കടലിന്റെ ഓരത്ത് എത്തിയത്. കൊളംബോ, ലാംഗ്‌വാക്കി, പോര്‍ട്ട് ക്ലാങ് വഴി സിംഗപ്പൂരിലേക്കുള്ള എട്ടു ദിവസം നീളുന്ന യാത്രയ്ക്ക് കൊച്ചിയില്‍ നിന്നും 100 ഇന്ത്യന്‍ അതിഥികള്‍ വെനേസിയയില്‍ കയറും. 2700 യാത്രക്കാരും 1050 ജീവനക്കാരുമായാണ് കോസ്റ്റ ലുമിനോസയുടെ സഞ്ചാരം. 12 നിലകളിലായി 1130മുറികളുള്ള യാത്രാ കപ്പലിന് 294 മീറ്റര്‍ നീളവും 93000 ടണ്‍ ഭാരവുമുണ്ട്. ജനുവരി 6ന് ഇറ്റലിയില്‍ നിന്ന് പുറപ്പെട്ട യാത്രയില്‍ 17 രാജ്യങ്ങളാണ് കാണുക.
ഇന്നലെ കൊളംബോയില്‍നിന്ന് കൊച്ചിയിലെത്തിയ കപ്പല്‍ വൈകിട്ടോടെ ഗോവയി ലേക്ക് തിരിച്ചു. തുടര്‍ന്ന് മുംബൈയും കണ്ട് ദുബായിലേക്ക് തിരിക്കും. ഇന്നലെ രാവിലെ എത്തിയ കോസ്റ്റ വെനേസിയയുടെ ആദ്യ കൊച്ചി സന്ദര്‍ശനമാണിത്. 2019 ല്‍ നീറ്റിലിറങ്ങിയ വെനേസിയ ദുബായ് സിംഗപ്പൂര്‍ വഴിയാണ്് കൊച്ചിയിലെത്തുന്നത്. 20 നിലകളിലായി 2116 ക്യാമ്പിനുകളും 324 മീറ്റര്‍ നീളവും 135500 ടണ്‍ ഭാരവുമുണ്ട്. 5100 യാത്രക്കാരും 1200 ജീവനക്കാരുമായി കൊച്ചിയിലെത്തിയ കപ്പലിലെ യാത്രക്കാരില്‍ ഒരു സംഘം പ്രത്യേക വിമാനത്തില്‍ ഡല്‍ ഹിയും ആഗ്രയും സന്ദര്‍ശിക്കും. ശനിയാഴ്ച പുറപ്പെടുന്ന വെനേസിയ മാലി വഴിയാണ് തിരിക്കുന്നത്. യുറോപ്യന്‍ യാത്ര കപ്പലായ മറില്ല ഡിസ്‌കവറി കൊളംബോയില്‍ നിന്ന് 2200 യാത്രക്കാരും 760 ജീവനക്കാരുമായാണ് എത്തിയിരിക്കുന്നത്.
ആധുനിക സൗകര്യങ്ങളുമായി 11 നിലകളിലായി 915 മുറികളുള്ള കപ്പലിന് 70000 ടണ്‍ ഭാരവും 32 മീറ്റര്‍ നീളവുമുണ്ട്. ഇന്നലെ രാത്രിയോടെ എറണാകുളം മട്ടാഞ്ചേരി വാര്‍ഫില്‍ നിന്ന് മറില്ല പുറപ്പെട്ടു. കോസ്റ്റ ലുമിനോസയും വെനേസിയയും കൊച്ചിന്‍ പോര്‍ട്ട് സന്ദര്‍ശിച്ച് മടങ്ങുമ്പോള്‍ കോസ്റ്റ നിയോ റിവേര ഡിസംബര്‍ മുതല്‍ മാര്‍ച്ച് വരെ കൊച്ചി ഹോം പോര്‍ട്ടാക്കിയിരിക്കുകയാണ്. മൂന്നു രാത്രി വരുന്ന മാലിദ്വീപിലേക്കുള്ള യാത്രയില്‍ കോസ്റ്റ നിയോ റിവേര ഏതാണ്ട് 7000ത്തോളം ഇന്ത്യന്‍ അതിഥികള്‍ക്ക് ആതിഥ്യം നല്‍കിയെന്ന് കോസ്റ്റ ക്രൂയിസിന്റെ ഇന്ത്യയിലെ പ്രതിനിധി നളിനി ഗുപ്ത പറഞ്ഞു.