ദമസ്‌കസ്: സിറിയന്‍ സര്‍ക്കാര്‍ അനുകൂല സംഘത്തിനുനേരെ ഇസ്‌റാഈല്‍ ആക്രമണം. സിറിയയിലെ ഖുനൈത്തിറ പ്രവിശ്യയിലെ നബഉല്‍ ഫവ്വാര്‍ മേഖലയിലാണ് ആക്രമണം നടത്തിയത്. സംഭവത്തില്‍ സര്‍ക്കാര്‍ അനുകൂല സംഘടനകളായ നാഷനല്‍ ഡിഫന്‍സ് ഫോഴ്‌സസി (എന്‍.ഡി.എഫ്) ന്റെ മൂന്ന് പോരാളികള്‍ കൊല്ലപ്പെട്ടതായി എന്‍.ഡി.എഫ് വൃത്തങ്ങള്‍ അറിയിച്ചു. ഏതാനും ദിവസങ്ങളായി മേഖലയില്‍ ഇസ്‌റാഈല്‍ സൈന്യം നടത്തിക്കൊണ്ടിരിക്കുന്ന ആക്രമണങ്ങളുടെ തുടര്‍ച്ചയാണ് സംഭവമെന്ന് അല്‍ജസീറ റിപ്പോര്‍ട്ട് ചെയ്തു.
ഗോലാന്‍ കുന്നുകളില്‍ സിറിയ നടത്തുന്ന വെടിവയ്പ്പിനു തിരിച്ചടിയായി മേഖലയില്‍ ആക്രമണം നടത്തിയതായി വെള്ളിയാഴ്ച ഇസ്‌റാഈല്‍ സൈന്യം അറിയിച്ചിരുന്നു. ഇസ്‌റാഈല്‍ അധിനിവേശത്തിനു പുറത്തുള്ള ഗോലാന്‍ കുന്നിലെ 30 ശതമാനം ഉള്‍പ്പെടുന്ന നബഉല്‍ ഫവ്വാറില്‍ സിറിയന്‍ സര്‍ക്കാര്‍ അനുകൂലികളായ സംഘത്തെ ലക്ഷ്യമിട്ടാണ് ആക്രമണം നടന്നത്. സംഭവം സിറിയന്‍ ഒബ്‌സര്‍വേറ്ററി ഫോര്‍ ഹ്യുമന്‍ റൈറ്റ്‌സും സ്ഥിരീകരിച്ചിട്ടുണ്ട്.