ബംഗളൂരു: തുടര്‍ തോല്‍വികളില്‍നിന്ന് കരകയറുന്നതിനുള്ള ശ്രമം ആര്‍.സി.ബി തുടങ്ങി. കൊല്‍ക്കത്തക്കെതിരേയുള്ള മത്സരത്തില്‍ വിരാട് കോഹ്‌ലിയും എബി ഡി വില്ലിയേഴ്‌സും തകര്‍ത്തടിച്ചപ്പോള്‍ കൊല്‍ക്കത്ത നൈറ്റ് റൈഡേഴ്‌സിനെതിരേ കൂറ്റന്‍ സ്‌കോര്‍ നേടി റോയല്‍ ചാലഞ്ചേഴ്‌സ് ബാംഗ്ലൂര്‍. മൂന്ന് വിക്കറ്റ് നഷ്ടത്തില്‍ 205 റണ്‍സാണ് ആര്‍.സി.ബി അടിച്ചെടുത്തത്. ഓപ്പണര്‍ പാര്‍ത്ഥിവ് പട്ടേല്‍ 24 പന്തില്‍ നിന്ന് 25 റണ്‍സാണ് നേടിയത്. തുടക്കം മുതല്‍ ആക്രമിച്ച് കളിച്ച കോഹ്‌ലിയ്ക്ക് ഡിവില്ലിയേഴ്‌സ് കൂട്ടായി എത്തിയപ്പോള്‍ സ്‌കോറിങിന് വേഗത കൂടി.
ഇരുവരും അര്‍ധ സെഞ്ചുറി പൂര്‍ത്തിയാക്കിയാണ് മത്സരം അവസാനിപ്പിച്ചത്.
കുല്‍ദീപ് യാദവ് മികച്ചൊരു റിട്ടേണ്‍ ക്യാച്ചിലൂടെ വിരാട് കോഹ്‌ലിയെ പുറത്താക്കുമ്പോള്‍ ആര്‍.സി.ബി നായകന്‍ 49 പന്തില്‍നിന്ന് 84 റണ്‍സാണ് നേടിയിരുന്നത്. 9 ബൗണ്ട@റിയും 2 സിക്‌സും അടങ്ങിയതായിരുന്നു കോഹ്‌ലിയുടെ ഇന്നിങ്‌സ്. ര@ണ്ടാം വിക്കറ്റില്‍ എബിയുമായി ചേര്‍ന്ന് ആര്‍.സി.ബിയ്ക്കായി വിരാട് കോഹ്‌ലി 108 റണ്‍സാണ് നേടിയത്. 32 പന്ത് നേരിട്ട ഡിവില്ലേഴ്‌സ് 63 റണ്‍സും സ്വന്തമാക്കി. കോഹ്‌ലിയും എബിയും പുറത്തായതോടെ 200 കടക്കാമെന്ന ബാംഗ്ലൂരിന്റെ മോഹങ്ങള്‍ക്ക് തിരിച്ചടിയാകുമെന്ന് കരുതിയെങ്കിലും 13 പന്തില്‍നിന്ന് 28 റണ്‍സ് നേടിയ മാര്‍ക്കസ് സ്റ്റോയിനിസ് ബാംഗ്ലൂരിന്റെ സ്‌കോര്‍ 200 കടത്തി. അവസാന നാലോവറില്‍നിന്ന് റോയല്‍ ചാലഞ്ചേഴ്‌സ് ബാംഗ്ലൂര്‍ 52 റണ്‍സ് കൂടിച്ചേര്‍ത്ത് ടീം സ്‌കോര്‍ 20 ഓവറില്‍ നിന്ന് മൂന്ന് വിക്കറ്റ് നഷ്ടത്തില്‍ സ്‌കോര്‍ 205 റണ്‍സിലേക്ക് ഉയര്‍ത്തി.
കൊല്‍ക്കത്തയ്ക്കായി സുനില്‍ നരൈന്‍, കുല്‍ദീപ് യാദവ്, നിതീഷ് റാണ എന്നിവര്‍ ഓരോ വിക്കറ്റ് നേടി. മറുപടി ബാറ്റിങ് തുടങ്ങിയ കൊല്‍ക്കത്ത ഒടുവില്‍ വിവരം ലഭിക്കുമ്പോള്‍ 9.4 ഓവറില്‍ രണ്ട് വിക്കറ്റ് നഷ്ടത്തില്‍ 93 റണ്‍സെടുത്തിട്ടുണ്ട്. 10 റണ്‍സെടുത്ത സുനില്‍ നരൈനും 33 റണ്‍സെടുത്ത റോബിന്‍ ഉത്തപ്പയുമാണ് പുറത്തായത്.