പള്ളിക്കല്‍: പ്രാഥമികാരോഗ്യ കേന്ദ്രത്തില്‍ ആവശ്യത്തിന് ഡോക്ടര്‍മാരില്ലാത്തത് രോഗികളെ വലയ്ക്കുന്നു. മണിക്കൂറുകളോളമാണ് രോഗികള്‍ക്ക് ചികിത്സക്കായി കാത്തിരിക്കേണ്ടി വരുന്നത്. ഡിഫ്തീരിയ രോഗബാധ കണ്ടെത്തിയ പ്രദേശമായതിനാല്‍ പനിയോടൊപ്പം തൊണ്ടവേദന കൂടി അനുഭവപ്പെടുന്നവര്‍ ഭീതിയോടെയാണ് ചികിത്സക്കെത്തുന്നത്.
പള്ളിക്കല്‍ പ്രാഥമികാരോഗ്യ കേന്ദ്രത്തില്‍ ദിനംപ്രതി മൂന്നൂറോളം രോഗികള്‍ ചികിത്സ തേടിയെത്തുന്നതായി ജീവനക്കാര്‍ പറയുന്നു. ആകെ ഒരു ഡോക്ടറാണ് ഇവിടെ സ്ഥിരമായി സേവനരംഗത്തുള്ളത്. ആഴ്ചയില്‍ മൂന്ന് ദിവസം കുട്ടികള്‍ക്കുള്ള കുത്തിവെപ്പിനായി സബ് സെന്ററുകളില്‍ പോകുന്നതിനാല്‍ മൂലം തിങ്കള്‍, ബുധന്‍, വെള്ളി ദിവസങ്ങളില്‍ മാത്രമാണ്  രോഗികളെ പരിശോധിക്കുന്നത്. ഈ ദിവസങ്ങളിലുണ്ടാകുന്ന വന്‍ തിരക്ക് മൂലം രോഗികളും ജീവനക്കാരും ഒരു പോലെ പ്രയാസപ്പെടുന്നു.
പള്ളിക്കല്‍ പ്രാഥമികാരോഗ്യ കേന്ദ്രത്തില്‍ കിടത്തി ചികിത്സക്കാവശ്യമായ സൗകര്യങ്ങളുണ്ടെങ്കിലും ആവശ്യത്തിന് ജീവനക്കാരില്ലാത്തതാണ് ഇതിന് തടസമാകുന്നത്. നിലവിലുള്ള ഡോക്ടര്‍ ഡിഫ്തീരിയക്കുള്ള കുത്തിവെപ്പിനും ബോധവത്കരണത്തിനും ക്യാംപുകളില്‍ പോകുന്നതിനാല്‍  പരിശോധനാ ദിവസങ്ങളില്‍ മറ്റൊരു ഡോക്ടര്‍ക്ക് താല്‍ക്കാലിക ചുമതല നല്‍കിയതായാണ് രോഗികളെ പരിശോധിക്കുന്നത്.