മാനന്തവാടി: അവധിക്കാലമായതോടെ കുട്ടിക്കച്ചവടക്കാരും സജീവമാകുന്നു. കഴിഞ്ഞ കുറെ ആഴ്ചകളായി രാവും പകലും ഇടതടവില്ലാതെ പഠനം നടത്തുകയും പരീക്ഷ എഴുതുകയും ചെയ്ത വിദ്യാര്‍ഥികള്‍ക്ക് ഇനിയുള്ള രണ്ട് മാസം ആഹ്ലാദത്തിന്റെ നാളുകളാണ്. പരീക്ഷ കഴിഞ്ഞ് മധ്യവേനലവധിക്ക് സ്‌കൂളുകള്‍ അടച്ചതോടെയാണ് കുട്ടിക്കച്ചവടക്കാരും സജീവമാകുന്നത്. ഒരു കൂട്ടം വിദ്യാര്‍ഥികള്‍ കളിച്ചും ചിരിച്ചും ബന്ധുവീടുകളില്‍ സന്ദര്‍ശനം നടത്തിയും അവധിക്കാലം ആഘോഷിക്കുമ്പോള്‍ മറ്റൊരു കൂട്ടം വിദ്യാര്‍ഥികള്‍ കുട്ടി കച്ചവടം നടത്തിയാണ് ആഘോഷിക്കുന്നത്. അവധിക്കാലത്ത് കച്ചവടം നടത്തി നാല് ചില്ലറയൊപ്പിക്കാനാണ് ഈ കുട്ടിക്കച്ചവടങ്ങള്‍. നഗരങ്ങളിലും ഗ്രാമീണ മേഖലകളിലെ റോഡരുകുകളിലും കുട്ടി കച്ചവടം പൊടിപൊടിക്കുകയാണ്. ഓലകൊണ്ടും പ്ലാസ്റ്റിക് ഷീറ്റ് കൊണ്ടും പാളയും തണിങ്ങും കൊണ്ടും പെട്ടി കടകള്‍ നിര്‍മിച്ചാണ് കുട്ടി കച്ചവടം പൊടിപൊടിക്കുന്നത്. ഉപ്പിലിട്ടമാങ്ങ, കൈതച്ചക്ക, നെല്ലിക്ക, തണ്ണി മത്തന്‍. തുടങ്ങിയ നാടന്‍ വിഭവങ്ങളും, മോരും പലതരം മിഠായികളും കുട്ടി വ്യാപാര സ്ഥാപനങ്ങളില്‍ ഒരുക്കിയിട്ടുണ്ട്. കുട്ടി കച്ചവടക്കാര്‍ക്ക് സഹായമായി മാതാപിതാക്കളും രംഗത്തുണ്ട്. പല കുട്ടി കച്ചവടക്കാര്‍ക്കും ഉപ്പിലിട്ട വിഭവങ്ങളും മോരും തയ്യാറാക്കി കൊടുക്കുന്നത് മാതാപിതാക്കളും കുടുംബാംഗങ്ങളുമാണ്. വഴിയാത്രക്കാരും വിനോദ സഞ്ചാരികളും കൂട്ടുകാരുമൊക്കെയാണ് ഉപഭോക്താക്കള്‍. മായം ചേര്‍ക്കാത്ത ഉപ്പിലിട്ടത് കിട്ടുമെന്നതിനാല്‍ തരക്കേടില്ലാത്ത കച്ചവടമാണ് ലഭിക്കുന്നത്.