കോഴിക്കോട്:എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ആതുരസേവന വിഭാഗമായ സഹചാരി റിലീഫ് സെല്ലിലേക്ക് നടത്തിയ ഫണ്ട് ശേഖരണത്തില്‍ ഈ വര്‍ഷം ഏറ്റവും കൂടുതല്‍ സംഖ്യ സ്വരൂപിച്ച ശാഖയെ പ്രഖ്യാപിച്ചു. കണ്ണൂര്‍ ജില്ലയിലെ പൊയിലൂര്‍ ശാഖയ്ക്കാണ് ഒന്നാം സ്ഥാനം. സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങളാണ് പ്രഖ്യാപിച്ചത്. ഫണ്ട് ശേഖരണം സമയബന്ധിതമായി പൂര്‍ത്തിയാക്കിയതില്‍ ഏറ്റവും കൂടുതല്‍ സംഖ്യ സ്വരൂപിച്ചത് മലപ്പുറം ഈസ്റ്റ് (ജില്ല), പെരിന്തല്‍മണ്ണ (മേഖല), തിരൂര്‍ക്കാട് (ക്ലസ്റ്റര്‍) എന്നീ ഘടകങ്ങളാണ്. നിശ്ചിത കാലയളവിന് ശേഷം ഈ വര്‍ഷത്തെ ഏറ്റവും കൂടുതല്‍ ഫണ്ട് ശേഖരണം നടത്തിയത് കോഴിക്കോട് (ജില്ല), കുറ്റ്യാടി (മേഖല), തൊട്ടില്‍പ്പാലം (ക്ലസ്റ്റര്‍) എന്നീ ഘടകങ്ങളാണെന്നും തങ്ങള്‍ അറിയിച്ചു.

സാമ്പത്തിക പ്രതിസന്ധികള്‍ക്കിടയിലും സഹചാരി ഫണ്ട് ശേഖരണം വന്‍ വിജയമാക്കിയ എല്ലാവരോടും തങ്ങള്‍ പ്രത്യേകം നന്ദി പറഞ്ഞു. ആതുര സേവന മേഖലയില്‍ പുതിയ ചില പദ്ധതികള്‍ കൂടി ഉടനെ ആരംഭിക്കുമെന്നും തങ്ങള്‍ അറിയിച്ചു.