മുക്കം: യു.ഡി.എഫ് വയനാട് പാര്‍ലമെന്റ് മണ്ഡലം തെരഞ്ഞെടുപ്പ് കമ്മിറ്റി ഓഫിസ് മുക്കത്ത് പ്രവര്‍ത്തനമാരംഭിച്ചു. കൊയിലാണ്ടി-എടവണ്ണ സംസ്ഥാന പാതയോരത്ത് കാരശ്ശേരി സര്‍വിസ് സഹകരണ ബാങ്കിന് സമീപമാണ് ഓഫിസ് പ്രവര്‍ത്തിക്കുന്നത്. പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്തു.
സി.പി.എമ്മിനെതിരേ ഒന്നും പറയാനില്ലെന്ന് രാഹുല്‍ ഗാന്ധി പറഞ്ഞത് അദ്ദേഹത്തിന്റെ മാന്യത കൊണ്ടാണെന്നും എന്നാല്‍ തങ്ങള്‍ക്ക് ഇടത് സര്‍ക്കാറിനും സി.പി.എമ്മിനുമെതിരേ ഒരു പാട് പറയാനുണ്ടെന്നും രമേശ് ചെന്നിത്തല പറഞ്ഞു. രാഹുല്‍ വയനാട്ടില്‍ മത്സരിക്കാന്‍ വന്നപ്പോള്‍ മുഖ്യമന്ത്രിക്ക് വിളറി പിടിച്ചു. രാഹുലിനെ സി.പി.എം എന്തിനാണിത്ര പേടിക്കുന്നതെന്നും യെച്ചൂരിയോട് പോലും നീതി പുലര്‍ത്താന്‍ കഴിയാത്ത പ്രസ്ഥാനമാണ് സി.പി.എം എന്നും ചെന്നിത്തല പറഞ്ഞു.
ദേശീയ തലത്തില്‍ മതേതര മുന്നണിയെ തുരങ്കം വെച്ചത് സി.പി.എം നേതാക്കളാണ്. സംസ്ഥാന സര്‍ക്കാരിന്റെ വിലയിരുത്തലാവും ഈ തെരഞ്ഞെടുപ്പെന്ന് പറയാന്‍ മുഖ്യമന്ത്രിയെ വെല്ലുവിളിക്കുന്നു. ഈ തെരഞ്ഞെടുപ്പോടെ ഇടത് മുന്നണിയെ നിലംപരിശാക്കുമെന്നും കേന്ദ്ര സംസ്ഥാന സര്‍ക്കാരുകള്‍ക്കെതിരായ വിലയിരുത്തലാവും തെരഞ്ഞെടുപ്പെന്നും ചെന്നിത്തല പറഞ്ഞു. തെരഞ്ഞെടുപ്പ് കമ്മിറ്റി കണ്‍വീനര്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ അധ്യക്ഷനായി. മുസ്‌ലിം ലീഗ് ദേശീയ ട്രഷറര്‍ പി.വി അബ്ദുല്‍ വഹാബ് എം.പി മുഖ്യപ്രഭാഷണം നടത്തി. കോഴിക്കോട് ഡി.സി.സി പ്രസിഡന്റ് ടി. സിദ്ദീഖ്, മുസ്‌ലിം ലീഗ് സംസ്ഥാന സെക്രട്ടറി സി.പി ചെറിയ മുഹമ്മദ്, കെ.പി.സി.സി ജനറല്‍ സെക്രട്ടറി എന്‍. സുബ്രമണ്യന്‍, കെ.പി അനില്‍കുമാര്‍, കെ.സി അബു, എന്‍.കെ അബ്ദുറഹിമാന്‍, സി.കെ കാസിം, സജി ജോസഫ് സംസാരിച്ചു.