മോണ്ടെ കാര്‍ലോ: ചരിത്ര നേട്ടം സ്വന്തമാക്കി മോണ്ടെ കാര്‍ലോ മാസ്റ്റേഴ്‌സ് കിരീടം സ്‌പെയിനിന്റെ റാഫേല്‍ നദാല്‍ പത്താം തവണയും നെഞ്ചോട് ചേര്‍ത്തു. നാട്ടുകാരനായ അല്‍ബര്‍ട്ട് റാമോസ് വിനോലസിനെ രണ്ട് സെറ്റ് നീണ്ട അനായാസ പോരാട്ടത്തില്‍ 6-1, 6-3 എന്ന സ്‌കോറിന് വീഴ്ത്തിയാണ് നദാല്‍ റെക്കോര്‍ഡ് കിരീട നേട്ടമാഘോഷിച്ചത്. ആധുനിക ടെന്നീസില്‍ ഒരു ടൂര്‍ണമെന്റില്‍ പത്തു തവണ കിരീട നേട്ടമാഘോഷിക്കുന്ന ആദ്യ ടെന്നീസ് താരമായി ഇതോടെ നദാല്‍ മാറി.
കളിമണ്‍ പ്രതലത്തിലെ അനിഷേധ്യനായി അറിയപ്പെടുന്ന നദാല്‍ കരിയറിലെ 50ാം കളിമണ്‍ കോര്‍ട്ട് കിരീട നേട്ടവും ആഘോഷിച്ച് ഇരട്ടി മധുരം രുചിച്ചു. 2005 മുതല്‍ 2012 വരെ തുടര്‍ച്ചയായി ഇവിടെ കിരീടം നേടിയ നദാല്‍ 2013ല്‍ ചാംപ്യന്‍പട്ടം ദ്യോക്കോവിചിന് വിട്ടുകൊടുത്തു. പിന്നീട് വീണ്ടും കിരീട നേട്ടം തുടര്‍ച്ചയായി ആഘോഷിക്കുകയായിരുന്നു.