കൊണ്ടോട്ടി:കരിപ്പൂര്‍ വിമാനത്താവള റോഡില്‍ വാഹനങ്ങള്‍ പാര്‍ക്ക് ചെയ്താലും ഇനി നഗരസഭക്ക് പാര്‍ക്കിങ് ഫീസ് നല്‍കണം.
എയര്‍പോര്‍ട്ട് അതോറിറ്റിയുടെ പ്രപ്പോസലിനെ തുടര്‍ന്നാണ് വിമാനത്താവള റോഡ് ഹജ്ജ് ഹൗസ് മുതല്‍ വിമാനത്താവള കവാടം വരെ പാര്‍ക്ക് ചെയ്യുന്ന വാഹനങ്ങള്‍ക്ക് പാര്‍ക്കിങ് ഫീസ് ഈടാക്കുക. നാലു ചക്രവാഹനങ്ങള്‍ക്ക് 20 രൂപയായിരിക്കും ഫീസ് വാങ്ങുക. വിമാനത്താവള റോഡ് കൊണ്ടോട്ടി നഗരസഭ പരിധിയില്‍ ഉള്‍പ്പെടുന്നതിനാലാണ് വാഹന പാര്‍ക്കിങ് ഈടാക്കാന്‍ നഗരസഭ കൗണ്‍സില്‍ യോഗം തീരുമാനിച്ചത്. നേരത്തെ വിമാനത്താവള റോഡിലെ അനധികൃത വാഹനങ്ങള്‍ നീക്കം ചെയ്യാന്‍ പൊലിസ് നടപടി സ്വീകരിച്ചിരുന്നെങ്കിലും ഫലവത്തായിരുന്നില്ല.