വെട്ടത്തൂര്‍: പൂങ്കാവനം അണക്കെട്ടിനു താഴ്ഭാഗത്തു കാര്യവട്ടം  അലനല്ലൂര്‍ പാതയില്‍ ബസും സ്‌കൂട്ടറും കൂട്ടിയിടിച്ചു. നിയന്ത്രണം വിട്ട ബസ് മണ്‍തിട്ടയിലിടിച്ചു നിന്നതിനാല്‍ താഴ്ചയിലേക്കു പതിക്കാതെ വന്‍ദുരന്തം ഒഴിവായി. ഇന്നലെ രാവിലെ പതിനൊന്നോടെയാണ് അപകടം. ആര്‍ക്കും പരുക്കില്ല. പെരിന്തല്‍മണ്ണയില്‍ നിന്നു മണ്ണാര്‍ക്കാട് ഭാഗത്തേക്കു പോകുന്ന മിനി ബസും എതിരെ വന്ന സ്‌കൂട്ടറുമാണു കൂട്ടിയിടിച്ചത്.
ഇടിയുടെ ആഘാതത്തില്‍ സ്‌കൂട്ടര്‍ പൂര്‍ണമായും ബസിന്റെ മുന്‍വശം ഭാഗികമായും തകര്‍ന്നു. 25ഓളം യാത്രക്കാരാണു ബസില്‍ ഉണ്ടായിരുന്നത്. ഡ്രൈവറുടെ അവസരോചിത ഇടപെടലാണു ദുരന്തമൊഴിവാക്കിയത്. നിയന്ത്രണംതെറ്റിയ ബസിനെ സമീപത്തെ മണ്‍തിട്ടയിലിടിപ്പിച്ചു നിര്‍ത്തുകയായിരുന്നു.