മഞ്ചേരി: ഗവ.മെഡിക്കല്‍ കോളജിലെ ആറാം എം.ബി.ബി.എസ് ബാച്ചിലേക്ക് ഒന്നാം ഘട്ടത്തില്‍ പ്രവേശനം നേടിയത് 53 വിദ്യാര്‍ഥികള്‍. അലോട്ട്‌മെന്റ് ലഭിച്ച വിദ്യാര്‍ഥികള്‍ക്ക് 11 വരെയാണ് കോളജില്‍ പ്രവേശനം നേടാനുള്ള സമയം അനുവദിച്ചിരിക്കുന്നത്.
ഒന്നാം ഘട്ടത്തില്‍ 53 പേര്‍ പ്രവേശനം നേടിയെങ്കിലും നൂറ് എം.ബി.ബി.എസ് സീറ്റുകള്‍ക്കുള്ള സ്ഥിരാംഗീകാരം ഉറപ്പാകാത്തത് മെഡിക്കല്‍ കോളജ് അധികൃതര്‍ക്ക് ആശങ്കയും നല്‍കുന്നുണ്ട്. കോളജിന് സ്ഥിരാംഗീകാരം നല്‍കുന്നത് സംബന്ധിച്ച് തീരുമാനമായിട്ടില്ലെങ്കിലും പ്രവേശന നടപടികള്‍ തുടരാനാണ് സര്‍ക്കാര്‍ നല്‍കിയ നിര്‍ദേശം. പ്രവേശന നടപടികള്‍ പൂര്‍ത്തിയാവുന്ന മുറയ്ക്കു മാത്രമെ പ്രവേശനം ലഭിച്ച വിദ്യാര്‍ഥികളുടെ എണ്ണം സംബന്ധിച്ചു വ്യക്തത കൈവരൂ.
അടിസ്ഥാന സൗകര്യങ്ങള്‍ ഉറപ്പാക്കുന്നതിലെ വീഴ്ചകളാണ് മഞ്ചേരി മെഡിക്കല്‍ കോളജിന് പ്രഥമ ഘട്ടത്തിലെ നൂറു സീറ്റുകളിലെ പ്രവേശനത്തിന് ഇനിയും സ്ഥിരാംഗീകാരം ലഭിക്കാതിരിക്കാന്‍ കാരണം. അവസാനഘട്ട അംഗീകാരവുമായി ബന്ധപ്പെട്ട് മഞ്ചേരി മെഡിക്കല്‍ കോളജില്‍ മെഡിക്കല്‍ കൗണ്‍സില്‍ ഓഫ് ഇന്ത്യ സംഘം കഴിഞ്ഞദിവസം പരിശോധന നടത്തിയിരുന്നു. കഴിഞ്ഞ മാര്‍ച്ചില്‍ പരിശോധന നടത്തിയ സംഘം സ്ഥിരാംഗീകാരം നല്‍കുന്നതില്‍ എതിര്‍പ്പ് പ്രകടിപ്പിച്ചതോടെ ഇത്തവണ എം.ബി.ബി.എസിന് പ്രവേശനം നല്‍കാനാവില്ലെന്ന ആശങ്കയും ഉയര്‍ന്നിരുന്നു.
തുടര്‍ന്ന് സംസ്ഥാന സര്‍ക്കാറും മെഡിക്കല്‍ കോളജ് അധികൃതരും നേരിട്ടു നടത്തിയ ഇടപെടലിനെ തുടര്‍ന്ന് ഈ വര്‍ഷം എം.ബി.ബി.എസിന് വിദ്യാര്‍ഥികളെ പ്രവേശിപ്പിക്കാനുള്ള അനുമതി മാത്രമാണ് എം.സി.ഐ നല്‍കിയിരിക്കുന്നത്. വിശദമായ പരിശോധനയില്‍ പോരായ്മകള്‍ പരിഹരിച്ചെന്നു ബോധ്യപ്പെട്ടാല്‍ മാത്രമെ മഞ്ചേരി മെഡിക്കല്‍ കോളജിന് സ്ഥിരാംഗീകാരം നല്‍കൂവെന്ന നിലപാടാണ് ഇക്കാര്യത്തില്‍ എംസിഐ കൈക്കൊണ്ടിരിക്കുന്നത്.
അതേ സമയം മെഡിക്കല്‍ കോളജ് ഹോസ്റ്റല്‍ കം ക്വാര്‍ട്ടേഴ്‌സ് സമുച്ചയങ്ങളുടെ നിര്‍മാണം ഒരു മാസത്തിനകം ആരംഭിക്കുമെന്നാണ് സൂചന.